बेरोजगार युवा मनके पीरा ले मैं दुखी अउ शर्मिंदा हवं, विश्वास राखव सरकार प्रयास करत हाबे : टीएस सिहंदेव

रायपुर.30। छत्तीसगढ़ म बेरोजगार मनके पीरा ह अब कोरोना काल के बाद अऊ बिकराल होगे हाबे। सरकार आर्थिक संकट ले लोगन ल उबारे के उदीम म लगे जरूर हाबे फेर येमा पढ़े-लिखे युवा मन खातिर कुछू ठोस बुता नइ होये ले सबो दुखी हाबे। बेरोजगार साथी मन सरलग सबो मंत्री, अफसर अउ आन जनप्रतिनिधी मनके अलावा मीडिया ल तको सोशल मीडिया के माध्यम ले सरकार के जन घोसना पाती अउ अटके शिक्षक भर्ती, पुलिस बल भर्ती के सुरता देवावत रिथे। 

पाछु दिन सीएम हाउस तिर होए हादसा के बाद तो लोगन मन अऊ जबर नाराज होवत हाबे सरकार ले। अइसन बखत म प्रदेश के बड़का नेता अउ छत्तीसगढ़ शासन म स्वास्थ्य मंत्री श्री टीएस सिंहदेव के ट्वीट के आखर ले बेरोजगार युवा मनला नवा आसा जागे हाबे। टीएस बाबा ह बड़ दुख के साथ लिखे हाबे के सबो बेरोजगार शिक्षा कर्मी, विद्या मितान, प्रेरक अउ आन युवा मनके पीरा ले मैं बहुत दुखी अउ शर्मिंदा हवं। जन घोसना पत्र के माध्यम ले जोन वादा आप मनले करेवं, मैं ओमा अटल हवं। विश्वास देवात हवं के सरकार प्रयास करत हाबे। हम आपके साथ हावन अऊ साथ रइबो।

सभी बेरोज़गार शिक्षा कर्मियों, विद्या मितान, प्रेरकों एवं अन्य युवाओं की पीड़ा से मैं बहुत दुखी और शर्मिंदा हूँ। जन घोषणा पत्र के माध्यम से जो वायदा आपको किया था, मैं उस पर अटल हूं।

यही विश्वास दिला रहा हूँ कि सरकार प्रयास कर रही है। हम आपके साथ हैं और साथ रहेंगे।

— TS Singh Deo (@TS_SinghDeo) June 30, 2020