कोरोना काल म विश्वविद्यालय के शिक्षण अउ परीक्षा प्रणाली खातिर राज्यपाल ह दीस कुलपति मनला सुझाव

रायपुर.20। कोरोना काल म विश्वविद्यालय पढ़ाई के साथ परीक्षा के तको व्यवस्था करय ताकि लइका मनके भविष्य खराब झिन हाबे। कोनो गरीब-आदिवासी लइका मनला असुविधा के सामना झिन करे बर परय अउ परीक्षा के दिन तिथि ल लइका मनके सहुलियत ल देखत बनावे। लइका मनके समस्या के समाधान बर हेल्पडेस्क अउ हेल्पलाइन नंबर के व्यवस्था तको करव। ये सब बात ल राज्यपाल सुश्री अनुसुईया उइके ह वीडियो कॉफ्रेसिंग के माध्यम से प्रदेश के विश्वविद्यालय के कुलपति मनके बइठक म किहिन।

आगू ओमन किहिन के महाविद्यालय मन म कार्यरत तदर्थ, संविदा, अतिथि अउ निजी महाविद्यालय के शिक्षक मनला लॉकडाउन अवधि के वेतन भुगतान नइ करे के शिकायत मिले हाबे। उंकर ऊपर शासन के दिशा-निर्देशानुसार कार्यवाही करो अउ ओमन ल नियमित रूप ले वेतन देवाव। आगू पंडित सुंदरलाल शर्मा (मुक्त) विश्वविद्यालय बिलासपुर के समन्वयक मनके लंबित भुगतान ल तुरंत करे के निर्देश तको दिस। साथ ही पंडित रविशंकर शुक्ल विश्वविद्यालय म ऑनलाइन परीक्षा फार्म भरत बखत परीक्षा शुल्क के कई बार खाता ले कटे पइसा अउ कृषि विश्वविद्यालय म प्रवेश खातिर संचालित ऑनलाईन पोर्टल के समस्या के समाधान करे के निर्देश दे हाबे। राजभवन के ये वीडियो कॉफ्रेसिंग म राज्यपाल के सचिव सोनमणि बोरा, कुलपति केशरीलाल वर्मा, डॉ. एस. के. पाटिल, बंशगोपाल सिंह, बलदेव शर्मा, डॉ. एम.के. वर्मा, श्रीमती अरूणा पल्टा, एस.के. सिंह, पी.के. सिन्हा, डॉ. एन.पी. दक्षिणकर, डॉ. माण्डवी सिंह, डॉ. ए.के. चन्द्राकर अउ प्रभारी कुलपति संजय अलंग जी मन उपस्थित रिहिन।