गरियाबंद पुलिस के कार्यवाही ले तस्कर मनके हालत पस्त, तेन्दुआ खाल के साथ धराइस आरोपी

गरियाबंद.20। गरियाबंद पुलिस ह सरलग बड़का कार्यवाही करत जिला म कई बछर ले सक्रिय तस्कर मनला दबोचत हाबे। पुलिस अधीक्षक भोजराम पटेल अउ अतिरिक्त पुलिस अधीक्षक सुखनंदन राठौर मनके दिशा निर्देश म गरियाबंद पुलिस के हौसला बुलंद हाबे। कार्यवाही ले लंबा समय ले जिला म सक्रिय तस्कर मनके हालत पस्त होगे हावय। कभू भारी अकन गांजा त कभू बोरी भर नगदी, इही कड़ी म थाना कोतवाली गरियाबंद ह जबर कार्यवाही करत एक नग तेन्दुआ के खाल सहित तस्कर ल गिरफ्तार करे हाबे। 

एफआईआर मुताबिक मुखबिर ले मिले सूचना के आधार म थाना प्रभारी आर.के. साहू के टीम ह पुलिस अधीक्षक के निर्देश अनुसार तेन्दुआ के खाल बेचे बर ग्राहक खोजत एक आदमी ल घेराबंदी करके पकड़े हाबे जेकर कब्जा ले 01 नग तेन्दुआ के खाल जप्त करे के विधिवत कार्यवाही करे गे हाबे। आरोपी रामनाथ नेताम ग्राम कासरपानी, केचरमुड़ा के आखरीपारा थाना पीपरछेड़ी जिला गरियाबंद निवासी उपर भारतीय वन्य जीव संरक्षण अधिनियम 1972 के धारा- 9, 39(2) (3) 49(A), 49(B), लोक संपत्ति के नुकसानी निवारण अधिनियम-1984 के धारा-3 के तहत अपराध पंजीबद्ध करे गे हाबे। 

आरोपी रामनाथ ह पुलिस ल बताइन के तेन्दुआ ल ओहा पानी म जहर देके मारे हाबे अउ खाल म नून डारके पेड़ म लटका के सूखोए रिहिन। आरोपी यहू बताये हाबे के दांत, नाखून अउ मूंछ ल डर के मारे जला दे हाबे। आरोपी ह खाल ल पथरा के तरि म बोरी म भरके लुका के राखे रिहिसे। पुलिस के मुताबिक तेन्दुआ के खाल मुड़ी ले पूंछी तक 59 इंच लम्बाल, पूरा बाल लगे हुए चमड़ा बने हालत म हाबे। गरियाबंद थाना कोतवाली म अपराध ह क्रमांक 0121/2020 म दर्ज हावय।