Home News Contact About
'अंजोर ' छत्तीसगढ़ी मासिक पत्रिका वेब संस्करण ---- anjore.cg@gmail.com

छत्तीसगढ़ी म पढ़ई-लिखई के सोर पता नइये, अंग्रेजी स्कूल के तइयारी म लगे हाबे सरकार

रायपुर.19। हमर अलग छत्तीसगढ़ राज ह सांस्कृतिक अउ साहित्यिक आंदोलन के परसादे मिले हाबे येला तो सबो जानथे। तभोच ले आज 20 बछर बाद घलो छत्तीसगढ़ के महतारी भाखा ल बने मान सम्मान नइ मिल पाइस। छत्तीसगढ़ी भाखा म पढ़ई-लिखई अउ येला राजकाज के भाखा बनाये के मांग सुरूच ले होवत हाबे अऊ आगू तको होते रइही जब तक के ये सरकार ह मांग ल नी मानही। 
आरो मिले हाबे के प्रदेश सरकार ह छत्तीसगढ़ राज्य म शिक्षा के स्तर म सुधार करे खातिर अंग्रेजी माध्यम के स्कूल खोलत हाबे। जेकर बर प्राचार्य मनके प्रशिक्षण कार्यक्रम तको चलत हावय। एस.सी.ई.आर.टी के मुताबिक अंग्रेजी माध्यम के उत्कृष्ट विद्यालय के प्राचार्य मनला पहिली बार  प्रशिक्षण दिये जात हाबे। किथे के शासन के मंशानुसार अंग्रेजी माध्यम के स्कूल ल उत्कृष्ट बनाए के प्रयास करे जावत हाबे। ये स्कूल म कक्षा पहली ले 12वीं तक के गरीब लइका मनला प्राथमिकता देवत जेमन अंग्रेजी माध्यम ले पढ़ना चाहत हाबे, ओमन ल निःशुल्क शिक्षा प्रदान करे जाही। जानकारी मुताबिक वर्तमान म विज्ञान (गणित अउ बायोलॉजी), वाणिज्य संकाय के कक्षा शुरू होही। ये अंग्रेजी स्कूल ह आन शासकीय संस्था सहिक कार्य करही, येमा कोनो प्राईवेट सदस्य नइ राहय अउ स्कूल छत्तीसगढ़ माध्यमिक शिक्षा मंडल ले संबंद्ध होही। 
लइका मनके प्रवेश के नियम के सहित शिक्षक भर्ती समेत आन सबो तइयारी होगे हाबे अऊ ये सत्र म स्कू्ल शुरू हो जही। को जनी सरकार काबर छत्तीसगढ़ी ल छोड़के अंग्रेजी कोति लेगत हाबे लइका मनला ये उही जाने फेर बड़े-बड़े गियानी किथे के लइका मनके पहिली शिक्षा उंकर महतारी भाखा म होना चाही। का छत्तीसगढ़ म काकरो महतारी भाखा अंग्रेजी हाबे ? 

कोई टिप्पणी नहीं:

टिप्पणी पोस्ट करें

जोहार पहुना, मया राखे रहिबे...

किस्सा कहिनी

Contact Us

नाम

ईमेल *

संदेश *

कला-संस्कृति-साहित्य

follow us

T-Twitter | F-Facebook | Y-Youtube | Instagram | Pinterest
महतारी भाखा के उरउती खातिर भारत के समाचार पत्र के पंजीयक कार्यालय नई दिल्ली म पंजीकृत ' अंजोर ' छत्तीसगढ़ी मासिक पत्रिका के anjor.online वेब संस्करण म छत्तीसगढ़ी बुलेटिन, किस्सा-कहानी अउ कला-मनोरंजन संग सोशल मीडिया के चारी, कुछ आन भाखा के अनुवाद समोखे, छत्तीसगढ़ के जन भाखा म जन-जन तक बगराथन। जुड़व ये उदीम - anjore.cg@gmail.com

सियानी गोठ

भारत के समाचारपत्रों के पंजीयक का कार्यालय नई दिल्ली
पंजीकरण संख्या-: CHHCHH/2014/56285