रायपुर.27। प्रदेश के मुखिया भूपेश बघेल जी ले आज उंकर निवास कार्यालय म ‘कल्पतरू‘ मल्टीयूटीलिटी सेंटर, सेरीखेड़ी बिहान रायपुर (उजाला ग्राम संगठन) के महिला मन मुलाकात करिन। महिला मन सेंटर म बने उत्पाद ल मुखिया जी ल देखावत बताइन के कोरोना संकट काल म सेंटर ह रोजगार अउ आय के बड़का सहारा बनिस। महिला मन अपन हाथ ले बने गोबर के गमला, राखी जइसन आन उत्पाद ल तको देखाइन।
मुख्यमंत्री ल महिला समूह के अध्यक्ष श्रीमती मोहिनी डहरिया ह ‘गोधन न्याय योजना’ खातिर धन्यवाद दीस। मुख्यमंत्री ह उंकर बुता के बढ़ई करत सीएसआर मद ले 15 लाख रूपिया के राशि उपलब्ध कराये के घोषणा करत मल्टीयूटीलिटी सेंटर सेरीखेड़ी के गतिविधी अउ उत्पाद ऊपर केन्द्रित फोल्डर के विमोचन करिस।
राज्य ग्रामीण आजीविका मिशन (बिहान) के तहत समूह के दीदी मन ग्लिसरीन, डिजायनर मोमबत्ती, बांस के ट्री गार्ड, अगरबत्ती, फिनायल, फेश वास, मशरूम, मुनगा पावडर के बने कुकीज, हर्बल टी, एलईडी बल्ब, स्लीपर, गोबर के गमला, हर्बल गुलाल अउ डिजायनर राखी तको बनाथे। कोरोना काल के बाद अब ओमन सेनेटाईजर, साबुन अउ मास्क तको बनावत हाबे।
ये मउका म रायपुर कलेक्टर श्री एस. भारतीदासन ह बताइन के पाछु बछर के दिसम्बर ले सुरू होए ये सेंटर म 180 महिला मन जुरे हाबे। अब तक ओमन कुल 1 करोड़ 10 लाख रूपिया के व्यवसाय कर डरे हाबे। जेमा लगभग 30 लाख रूपिया के मजदूरी तको होए हाबे। इहां दीदी मन 25 रूपए प्रति घंटा के हिसाब ले बुता करथे अऊ 200 रूपिया रोजी कमाथे। ये मउका म मुख्य सचिव, मुख्यमंत्री के अपर मुख्य सचिव, जिला पंचायत रायपुर के सीईओ संग समूह के श्रीमती मोहिनी डहरिया, श्रीमती स्वमिता वर्मा, श्रीमती दया ध्रुव, श्रीमती लता मनहर अउ श्रीमती सीमा साहू मन उपस्थित रिहिन।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।