रायपुर.20। छत्तीसगढ़ राज्य म अबतक कुल 144828 संभावित लोगन मनके सेंपल जांच करे गे हाबे जेमा 2545 कोरोना पॉजिटिव मिले हाबे। येमा से अब तक 1885 मरीज इलाज के बाद बने होके अपन घर चल दे हाबे। विभाग कोति ले जारी कोरोना बुलेटिन के मुताबिक आज छत्तीसगढ़ म कोरोनो ले आज 13 वां मउत होगे। ये मरीज ह जांजगीर जिला के आए अउ कोरोना के अलावा ओला लीवर के बीमारी तको रिहिसे।
छत्तीसगढ़ म आज कुल 89 नवा कोरोना पॉजिटिव मरीज मिले हाबे जेमा जशपुर के 39, दुर्ग के 14, रायपुर के 14, रायगढ़ के 05, राजनांदगांव के 5, बलौदाबाजार के 4, बलरामपुर के 4, कवर्धा के 3, सरगुजा के 1 सामिल हावय। सबो के अस्पताल म भर्ती के प्रक्रिया चलत हाबे।
आज रायपुर के 11 कोरोना पॉजिटिव मरीज म पुलिस के जवान तको सामिल हाबे। बताये जाथे के सीता नगर, गोगांव, थाना गुढि़यारी ह पॉजिटिव केस मिले के सेती कन्टेनमेंट जोन घोषित कर दे गे हाबे।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।