रायपुर। कोरोना राई के सेती देशबंदी म फंसे लोगन मन अब अपन-अपन जनम भुइंया लहुंटत हाबे। बिपत के बेरा म छत्तीसगढ़ के मुख्यमंत्री भूपेश बघेल ह बने जिकर करत लोगन ल वापिस लाने खातिर जबर प्रयास करिन। मिले जानकारी के मुताबिक 56 रेलगाड़ी ले 76 हजार 772 श्रमिक बने-बने वापिस छत्तीसगढ़ आगे हाबे। आन साधन उक ले अबतक 2 लाख 44 हजार 686 श्रमिक मनके वापसी होगे हाबे, लोगन अऊ आतेच हाबे।
जानबा होवय के आन राज ले आए लोगन मन अपन भुइंया म आगे हाबे फेर घर म नइ गे हाबे। कोरोना के संक्रमण ल देखत ओमन ल राज्य, जिला अउ पंचायत स्तर म बने कुल 19 हजार 216 क्वारेंटाइन सेंटर म रूकवाये गे हाबे। क्वारेंटाइन सेंटर म लोगन मन खातिर भोजन, पेयजल, चिकित्सा के इंतजाम हाबे। एजेंसी ले मिले आरो के मुताबिक अइसन श्रमिक जेन ह रेड जोन ले आए हाबे उंकर रैपिड किट ले जांच तको होवथाबे। कोनो बीमार हे तव उंकरो अलग से ठहरे के साथ ही जरूरत परे म अस्पताल के आईशोलेसन वार्ड म राखे के बेवस्था प्रशासन करत हाबे।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।