जांजगीर-चांपा। छत्तीसगढ़ सरकार के मुखिया भूपेश बघेल ह जांजगीर-चांपा जिला के बम्हनीडीह अउ बाराद्वार ल तहसील बनाये घोसना करे रिहिसे। राजस्व अउ आपदा प्रबंधन विभाग कोति ले गत 26 फरवरी 2020 के राजपत्र म प्रकाशित प्रारंभिक सूचना के मुताबिक नवा तहसील बम्हनीडीह म 17 पटवारी हल्का के कुल 50 गांव अउ नवा तहसील बाराद्वार म 17 पटवारी हल्का के कुल 39 गांव सामिल रइही। जिला कलेक्टर यशवंत कुमार ह संबंधित तहसीलदार मनला निर्देशित करत केहे हाबे के दूनो नवा तहसील के गठन के दावा, आपत्ति 15 जून 2020 तक लेके कार्रवाई करके, कलेक्टर कार्यालय म पठोवय।
नवा तहसील बम्हनीडीह के मेड़ो के रक्सेल म तहसील चांपा, भंडार म बिलाईगढ़, उत्ती म सक्ती अउ बुढ़ती म नवागढ़ तहसील होही। अइसने नवा तहसील बाराद्वार के मेड़ो म रक्सेल म करतला, भंडार म जैजैपुर, उत्ती म सक्ति अउ बुढ़ती म चांपा तहसील के मेड़ो होही। जानबा होवय के बम्हनीडीह अउ बाराद्वार बछर 2008 ले उप तहसील कार्यालय चल हाबे, इहां नायब तहसीलदार कोति ले राजस्व संबंधी काम के निपटारा होवे। अब तहसील के दर्जा मिले के बाद इहां तहसीलदार के पदस्थापना होही। जेकर ये अंचन के लोगन ल किसानी बुता के आन सबो सुविधा लक्ठा म मिल जही।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।