रायपुर.22। कोविड-19 के बाड़त संक्रमण ल देखत अब बर-बिहाव अउ काठी-माटी के कार्यक्रम करे खातिर प्रशासन ले अनुमति लेना जरूरी हाबे। शासन के जरूरी दिशा-निर्देश के बीच लोगन ल अपन कार्यक्रम निपटाये ल परही। ये संबंध म रायपुर कलेक्टर डॉ.एस.भारतीदासन ह लॉकडाउन अवधि म रायपुर जिला के अंतर्गत संबंधित तहसीलदार मनला उंकर क्षेत्र के संबंधित लोगन मन कोति ले मिले आवेदन म नियमानुसार अनुमति प्रदान करे खातिर अधिकृत करे हाबे।
मिले जानकारी के मुताबिक रायपुर तहसील खातिर अमित कुमार बेक, तिल्दा तहसील खातिर राकेश ध्रुव, आरंग तहसील खातिर नरेंद्र कुमार बंजारा अउ अभनपुर तहसील खातिर शशीकांत कुर्रे मन अधिकृत हाबे। ओमन ल यहू निर्देशित करे गे हाबे के बिहाव म फिजिकल डिस्टेंसिंग के पालन करत एक समय म अधिकतम 10 व्यक्ति ल ही उपस्थित रहे के अनुमति मिलही। अइसने फिजिकल डिस्टेंसिंग के पालन करत एक समय म अधिकतम 20 व्यक्ति के उपस्थिति म अंतिम संस्कार के अनुमति मिलही।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।