कोरोना राई के सेती देशभर म लागु लॉकडाउन-3 ह 17 मई के सिरावत हाबे। येकर बाद के रणनीति खातिर प्रधानमंत्री श्री नरेन्द्र मोदी ह देशभर के मुख्यमंत्री मनला वीडियो कांफ्रेन्स के माध्यम ले सुझाव मांगे रिहिसे। छत्तीसगढ़ के मुख्यमंत्री श्री बघेल ह अपन सुझाव पाती पठो दे हाबे। ओमन लिखथे के अर्थव्यवस्था ल पटरी म लाने खातिर सावधानी के साथ सबो काम-बुता ल शुरू करना चाहिए। व्यक्तिगत रूप ले सेवा देवइया टेक्नीशियन, इलेक्ट्रीशियन, मैकेनिक, मिस्त्री मनला अनुमति मिलय साथ म उंकर टूल्स, उपकरण सहित आन काम के समान के दुकान खोले के अनुमति तको मिलय। येकर अलावा सीएम ह यहू मांग करे हाबे के राज्य मनला अपन जिला ल रेड जोन, ऑरेंज जोन अउ ग्रीन जोन म बाटे के अधिकार मिलय।
मुख्यमंत्री श्री बघेल के पीएम ल सुझाव-
- कंटेनमेंट जोन ल छोड़ के आन सबो समान के बिक्री के अनुमति मिलय।
- अंतर्राज्यीय सीमा ल खोलना फिलहाल उपयुक्त नइये।
- वाहन शोरूम, वर्कशॉप, ई-कामर्स सेवा शुरू होवय।
- होटल ह फिजिकल डिस्टेंस के शर्त म केवल रहवासी सुविधा खातिर खुलय।
- टेक्नीशियन, इलेक्ट्रीशियन, मैकेनिक, मिस्त्री ल सेवा देवइया दुकान खुलय।
- नगरीय क्षेत्र म फिजिकल डिस्टेंस के शर्त म निर्माण काम शुरू होवय, श्रमिक मनके परिवहन खातिर पास के अनुमति अनिवार्य करे जाए।
- रेड जोन, ऑरेंज जोन अउ ग्रीन जोन के निर्धारण के अधिकार राज्य मनला मिलय।
- गैर आवश्यक अंतर्राज्यीय परिवहन म 15 जून तक प्रतिबंध।
- श्रमिक स्पेशल ट्रेन संग आन नवा रेल ह संबंधित राज्य के अनुमति ले चलय।
- हवाई सेवा सिरिफ लॉकडाउन म फंसे आदमी बर होवय, सार्वजनिक परिवहन सेवा बंद राहय।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।