DPR_T/C। देस-विदेस म सचरे कोरोना महामारी ह छत्तीसगढ सरकार के सजगता के सेती जादा लाहो नी ले पाइस। इहां उही केस आगू आइस जेन मन विदेस दौरा ले आये रिहिन हाबे, सिरिफ एक के छोड़े। अब छत्तीसगढ़ बर सबले राहत के खबर आये हाबे के ओमा ले तीन झिन के अपस्ताल छुट्टी होगे हावय। पांच मरीज अउ बांचगे जेमा चार रायपुर म एक राजनांदगांव म भरती हावय।
आज जेन युवती के अस्पताल ले छुट्टी होए हाबे ओहा रायपुर के आये अउ एम्स म ओकर इलाज चलत रिहिसे। डीपीआर के मुताबिक स्वास्थ्य मंत्री टी.एस. सिंहदेव ह वीडियो कॉन्फ्रेंस ले कोविड-19 संक्रमण के रोकथाम अउ इलाज के समीक्षा करिन हावय। छत्तीसगढ़ म कुल एक हजार 412 संभावित लोगन के चिन्हारी करके सैंपल जांच करवाये गे रिहिसे, जेमा एक हजार 234 सैंपल ह कोरोना जांच म निगेटिव आइसे बाकी 169 सैंपल के जांच रिपोर्ट नी मिले हाबे।