कोविड-19 के जांच बर भारतीय वैज्ञानिक मन बनाइस पेपर-स्ट्रिप किट
Author -
personअंजोर
अप्रैल 04, 2020
share
नियामक निकाय ले उपयोग के अनुमति के बाद इही किट ले होही जांच: डॉ शेखर सी. मांडे PIB_T/C। हमर देस के वैज्ञानिक मन बना डरिस कोविड-19 वायरस के लघियात जांच किट। ये एक पेपर-स्ट्रिप आधारित परीक्षण किट आए जेन ह कम समय म संक्रमण के पता लगाही। वीआईबी ने मिले आरो मुताबिक सीएसआईआर ले संबद्ध नई दिल्ली के जिनोमिकी अउ समवेत जीव विज्ञान संस्थान (आईजीआईबी) वैज्ञानिक डॉ. सौविक मैती अउ डॉ. देबज्योति चक्रवर्ती के अगुवई म एक टीम ह येला बनाये हाबे। बताथे के ये पेपर-स्ट्रिप किट बहुत सस्ता अउ कम समय म काम करथे। अभी येकर परीक्षण के वैद्यता के जांच होवत हाबे तेकर पाछू इस्तेमाल करे जाही। बताती अनुसार आईजीआईबी के वैज्ञानिक मन किथे के ओमन ये टूल उपर लगभग दू बच्छर ले काम करत रिहिन, फेर जब जनवरी म कोरोना के कहर ल देखिस तब येकर परीक्षण शुरू करिन। आगू सीएसआईआर के महानिदेशक डॉ. शेखर सी मांडे किथे कि ये किट के विकास के पहली परिणाम तो उत्साहजनक हावय हालाँकि प्राथमिक नतीजा अभी सीमित नमूना म देखे गे हावय। बाद म आन देस ले मंगाए नमूना म तको परीक्षण करे जाही अउ नियामक निकाय ले येकर उपयोग के अनुमति मिले के बाद ये किट ल बउरे जाही।