छत्तीसगढ़ी फिल्म स्टार अनुज शर्मा के एसो कई ठी फिलिम अवइया रिहिसे जेन कोरोना के सेती पाछू घूचगे। पउर साल अनुज शर्मा के रंगोबती, राजा भइया एक आवारा अउ सॉरी लव यू जान रिलीज होए रिहिस। जेन ल दर्शक मन गजब मन करिन। अभी लॉकडाउन के पहिली ओमन मार डारे मया म के शूटिंग पूरा करिन।
वैश्विक महामारी काल म सबेच कोनो काहत हाबे कि जान हे तव जहान हे माने सबो ल कोविड-19 के संक्रमण ले बाचना हाबे त घरे म रहे बर परही। बॉलीवुड ले छॉलीवुड तक के सबोच कलाकार मन इही संदेस ल सोशल मीडिया के माध्यम ले देवत हाबे। हमर सुपर स्टार अनुज शर्मा तो सबले एक कदम आगू बढ़के काम करत हाबे। अपन संग जम्मो परिवार ल ले लेके आनंद-मंगल से घरे म समय देवत आन मन ल तको घरे म रेहे बर जागरूक करत हाबे।
अनुज शर्मा के रोज सोशल मीडिया म नवा-नवा रूप देखे बर मिलत हाबे। कोनो दिन बिटिया मन संग तो कोनो दिन श्रीमती संग तव कोनो दिन अपन महतारी संग टिकटॉक बनाके शेयर करत हाबे। एंजॉय के संगे-संग जन-जागरण के सुघ्घर गोठ तको शेयर करथे जेन नीक अउ सीख के लइक रिथे।