महान पौराणिक धारावाहिक रामायण म अदाकारी करइया सबो कलाकार मन ल दर्शक मन आजो उही रूप म चिनथे, जेन भूमिका म ओमन रामायण म रिहिसे। अतेक बछर बाद फेर रामानंद सागर के रामायण के दूरदर्शन म प्रसारण ह कलाकार मनके जुन्ना सुरता ल हरियर कर दिस।
ममता, प्रेम अउ वात्सल्य के प्रतिमूर्ति जनक दुलारी माता सीता के किरदार तो सबो ल सुरता होही। येला निभाए रिहिस दीपिका चिखलिया ह जेन रामायण के संगे-संग अउ केउ ठी फिलिम, धारावाहिक करिन फेर ओला आज भी लोगन ह सीता के रूप म ही देखथे। राम अउ सीता भर नहीं रामानंद सागर कृत रामायण के सबो कलाकार मनके चिन्हारी ओकर किरदार ले होथे। सीता के असल नाम दीपिका चिखलिया टोपीवाला हाबे। ओमन अभिनय के संग पेंटिग, व्यवसाय अउ राजनीति म तको दखल रखथे।
सीता के वइसे तो सबोच प्रसंग ह मनमोहक लागथे, फेर दर्शक म जादा प्रभाव राम, लक्ष्मण के चौदह बरस के बनवास ह दिखथे। सिरतोन म सुकुमारी जानकी ल जंगल-जंगल भटकत देख रोवासी लगाथे। जबर दुख तो ओ दिन लागिस जब रावण ह छल से सीता के हरण कर लिस। हे राम! हे राम! हे सीता! हे सीता! हे माता! हे माता! के गोहार सीता, राम अउ लक्ष्मण ल जतका बियाकुल करिस ओकर ले आगर दर्शक म होगिन। कतकोन मन तो टीवी के आगू गोहार पारके रो तको डरे रिहिस। कथा जइसे-जइसे आगू बाड़त हाबे मन म धिरज के बांध बंधावत हाबे कि अब रावण के वध करके सीता ल छोड़ा के लेगही राम। दीपिका सही जीव म जी पारके अपने भूमिका निभाये म सबोच कलाकार मन काम करिन। भले राक्षस मनला देख के जी कउवा जाए फेर बाद म उंकर कलाकारी के गजब बड़ई तको होए हाबे।
दीपिका चिखलिया ह कुछ दिन पहिली अपन इंस्टाग्राम रामायण के शूटिंग क बखत के फोटो ल शेयर करिन। ओमन सुरता करे हाबे रामानंद सागर जी के रामायण युनिट ल जेमा के कतकोन ह आज साथ नइये फेर उनला कभू नी भुला सकन।
