सीजीहाट ले रायपुर ल मिलही ऑनलाइन फल-सब्जी

फल-सब्जी ऑनलाइन डिलीवरी वेबसाइट सीजीहाट के लोकार्पण

लॉकडाउन 2 शुरू होए के बाद अब शासन कड़ाई के संग जनजीवन सरल करे के तको उदीम करत जावथे। रायपुर शहर के रहइया मन बर बड़े खबर आहे के छत्तीसगढ़ सरकार ह अब सीजीहाट नाव के वेबसाइट बनाये हाबे जेकर ले ऑनलाइन फल अउ सब्जी लोगन ल घर बइठे मिलही। 

डीपीआर के मुताबिक मुख्यमंत्री भूपेश बघेल जी ह अपन निवास कार्यालय म ऑनलाइन डिलीवरी वेबसाइट सीजीहाट के लोकार्पण करिन। ये मउका म कृषि मंत्री रविंद्र चौबे, स्कूल शिक्षा विभाग के प्रमुख सचिव डॉ आलोक शुक्ला अउ मुख्यमंत्री के उप सचिव श्रीमती सौम्या चौरसिया तको उपस्थित रिहिन। ये वेबसाइट  http://cghaat.in म पंजीयन के बाद कलेक्टर के अनुमोदन होही अउ ये घर पहुंच सेवा शुरू हो जही। येमा लवइया अउ बेचइया दूनो के पंजीयन फोकट म होही। फल अउ सब्जी के भाव तको ऑनलाइन दिखही। 150 रूपिया ले आगर के जिनिस बिसाये म डिलीवरी चार्ज नई लागय। वेबसाइट म एसएमएस नोटिफिकेशन, आर्डर ट्रैकिंग के संग शिकायत तको दर्ज करे जा सकथे। अभी ये सेवा ह सिरिफ रायपुर शहर बर शुरू होए हाबे 2-1 दिन म आन जिला म तको शुरू करे जाही अइसे जानकारी मिले हाबे। धीरे-धीरे येमा आन​ जिनिस दूध, किराना सामान, कपड़ा, शहद, वनोपज, अण्डा उ तको मिलही।