शिवरीनारायण महोत्सव म पहुंचिस प्रदेस के मुखिया

शिवरीनारायण तहसील कार्यालय के सुरू होही कामकाज

अंजोर.ए। छत्‍तीसगढ़ के ठउर-ठउर म मेला मड़ई भराथे फेर मेला म धारमिक महत्‍ता के ठउर गिनती के हावय जेन म सबले आगु नाव आथे शिवरीनारायन मेला। इहां के परंपरा ह तो पौरानिक हावय। भगवान राम अउ शबरी दाई के पुण्‍य धरा म हरेक बछर मेला भराथे जेन म सरकार तको शिवरीनारायण महोत्सव के नाम म बड़का आयोजन करथे। इही मेला के समापन के मउका म प्रदेश के मुख्यमंत्री भूपेश बघेल शिवरीनारायण पहुंचिस अउ भगवान नर-नारायण के पूजा करिस।

ये मउका म ओमन किहिन के मेला तइहा ले जुरे हावय। मै भगवान नर-नारायण ले प्रदेश सुख-समृद्धि के आसिस मांगे हाबव अउ आज ये मउका म मै सबो संगी मन ला शिवरीनारायण महोत्सव अउ माघी पूर्णिमा मेला के बधाई देवत हवं। ओमन महोत्‍सव खातिर साढ़े तीन लाख रूपिया अउ 10 लाख रूपिया के घोसना करे हावय।

ओमन आगु किहिन के डॉ. खूबचंद बघेल, मिनीमाता अउ बिसाहू दास महंत जइसन महान विभूति मन के समृद्ध छत्तीसगढ़ राज्य के सपना देखे रिहन जेन अब साकार होही। ये मउका म पूर्व विधायक अउ आयोजक समिति के अध्यक्ष महंत श्री रामसुंदर दास, जिला पंचायत के अध्यक्ष श्री नंदकिशोर हरबंश, पूर्व सांसद श्रीमती कमला मनहर, पूर्व विधायक सर्वश्री मोतीलाल देवांगन, चुन्नीलाल साहू, चौनसिंह सामले, जिला पंचायत सदस्यगण, गुरू श्री खुशवंत सहित बिलासपुर रेंज के आईजी श्री प्रदीप गुप्ता, कलेक्टर श्री नीरज कुमार बनसोड़, पुलिस अधीक्षक श्रीमती पारूल माथुर, के अलाव अऊ गजब झिन आम नागरिक मौजूद रिहिन।