डीके अस्पताल नवा रूप म फेर सुरू होही 2 अक्टूबर ले

रायपुर। तइहा समे ले रायपुर अउ तिर तखार के लोगन मन बर भगवान बरोबर दाउ कल्याण सिंह के दान ले मिले ठउर म बड़का सरकारी अस्पताल बने रिहिस जेन ल हम सब डीके अस्पताल के नाव ले जानन। फेर छत्तीसगढ़ राज अलग बने के बाद अस्पताल ह अउ बड़का रूप लेके नवा ठउर म 700 बिस्तर वाला होगे, मेकाहारा के रूप म। डीके भवन म मंत्रालय चलत रिहिसे जोन कुछ साल ले खाली परे रिहिसे। सरकार ह ओला नवा रूप म फेर सुरू करत हावय।

एजेंसी ले मिले जानकारी के मुताबिक सुपर डीके अस्पताल के लोकार्पण 2 अक्टूबर के होही। जेन म प्रदेस के मुखिया डॉक्टर रमन सिंह के अलावा स्वास्थ्य मंत्री अजय चन्द्राकर, रायपुर लोकसभा सांसद रमेश बैस, कृषि मंत्री बृजमोहन अग्रवाल, लोक निर्माण मंत्री राजेश मूणत, संसदीय सचिव स्वास्थ्य शिवशंकर पैकरा, रायपुर उत्तर विधायक श्रीचंद सुंदरानी, रायपुर ग्रामीण विधायक सत्यनारायण शर्मा अउ महापौर प्रमोद दुबे जी ह पहुना रूप जुरियाही।