छत्तीसगढ़ म नवाचार आऊ उद्यमिता ल मिलही नवा उड़ान: NIT रायपुर म ₹88.76 करोड़ के लागत ले बनही 'सेंटर ऑफ एक्सीलेंस', सीएम विष्णु देव साय ह रखिन नींव
रायपुर। छत्तीसगढ़ के पढ़इया लइका आऊ जुवा (युवा) मन के सपना ल नवा पंख देए बर राज्य सरकार ह एक ठन अब्बड़ बड़े कदम उठाए हे। प्रदेश म नवा खोज (नवाचार) आऊ खुद के रोजगार-धंधा (उद्यमिता) ल आगू बढ़ाए बर मुख्यमंत्री श्री विष्णु देव साय ह राजधानी के एनआईटी (NIT) रायपुर परिसर म ₹88.76 करोड़ के भारी-भरकम लागत ले बनइया 'श्रीमती मिथिलेश अग्रवाल सेंटर ऑफ एक्सीलेंस फॉर इनोवेशन एंड एंटरप्रेन्योरशिप' के विधिवत आधारशिला (नींव) रखिन। ये केंद्र के बने ले छत्तीसगढ़ के लइका मन ल अब बड़े-बड़े टेक्नोलॉजी सीखे आऊ अपन स्टार्टअप सुरू करे बर बाहिर के राज्य मन म भटके ल नइ परय।
AI, रोबोटिक्स आऊ 3D प्रिंटिंग समेत खुलही 7 ठन हाईटेक प्रयोगशाला (लैब)
एनआईटी रायपुर म बनइया ये अत्याधुनिक केंद्र ह पूरा तरह ले वर्ल्ड-क्लास सुविधा ले लैस रइही। इहां आर्टिफिशियल इंटेलिजेंस (AI) अऊ मशीन लर्निंग, रोबोटिक्स, साइबर सुरक्षा (साइबर सिक्योरिटी), डेटा एनालिटिक्स आऊ 3D प्रिंटिंग समेत सात ठन आधुनिक प्रयोगशाला (लैब) स्थापित करे जाही। ये हाईटेक सेंटर म प्रदेश के होनहार जुवा मन ल नवा अनुसंधान (रिसर्च), तकनीकी नवाचार, स्टार्टअप इन्क्यूबेशन के सुविधा मिलही। सबले बड़े बात ये हे कि जिन लइका मन करा कोनो नवा आइडिया (विचार) हे, ओमन इहां आके अपन विचार ल एक ठन सफल बिजनेस आऊ कंपनी (उद्यम) के रूप म बदल सकहीं।
हमर जुवा मन सिरिफ रोजगार मंगइया नहीं, रोजगार देवइया बनंय: मुख्यमंत्री साय
कार्यक्रम के बेरा म मुख्यमंत्री श्री विष्णु देव साय ह एनआईटी के विद्यार्थी मन डहर ले बनाए गे नवा-नवा मॉडल आऊ आविष्कार (नवाचार) मन के बारीकी ले अवलोकन करिन आऊ लइका मन के हुनर के अब्बड़ तारीफ करिन। जुवा मन के उत्साह बढ़ावत हुए मुख्यमंत्री ह कहिन कि आज के समय म हमर छत्तीसगढ़ के जुवा मन सिरिफ नौकरी या रोजगार मंगइया झन बनंय, बल्कि अपन दम म नवा कंपनी खोल के चार झन ल रोजगार देवइया घलो बनंय। सरकार ह जुवा मन के हर नवा कदम म ओमन के संग खड़े हे।
स्टार्टअप आऊ AI मिशन बर ₹500-500 करोड़ के ऐतिहासिक बजट
छत्तीसगढ़ के जुवा मन ल आर्थिक रूप ले मजबूत बनाए आऊ ओमन के स्टार्टअप ल आगू बढ़ाए बर राज्य सरकार ह खजाना खोल दे हे। सरकार ह प्रदेश म 'मुख्यमंत्री स्टार्टअप एवं निपुण मिशन' ल बढ़ावा देए बर ₹500 करोड़ अऊ 'मुख्यमंत्री AI मिशन' बर घलो ₹500 करोड़ रूपिया के बड़े प्रावधान करे हे। हजार करोड़ रूपिया के ये निवेश ले आने वाला समय म छत्तीसगढ़ म हजारों नवा स्टार्टअप खड़े होहीं आऊ स्थानीय स्तर म ही बड़े पैमाना म रोजगार के नवा-नवा मउका पैदा होही।
तकनीकी विकास आऊ नवाचार के बड़े गढ़ बनही हमर छत्तीसगढ़
मुख्यमंत्री श्री विष्णु देव साय के अगुवई म प्रदेश के सुशासन सरकार ह जुवा मन के प्रतिभा, तकनीकी कौशल (हुनर) आऊ उद्यमशीलता ल सरलग प्रोत्साहित करत हे। सरकार के साफ लक्ष्य हे कि आने वाला बछर मन म छत्तीसगढ़ ल पूरा देस म नवाचार (इनोवेशन) आऊ तकनीकी विकास के एक ठन प्रमुख केंद्र (हब) के रूप म स्थापित करे जाए, जिहां गांव आऊ सहर के हर होनहार लइका ल आगू बढ़े के पूरा मउका मिल सकय।
अंजोर:छत्तीसगढ़ी समाचार, संपादक/अनुवादक-जयंत साहू 9826753304
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।