छत्तीसगढ़ म AI तकनीक ल मिलही बढ़ावा: पांचों संभाग म खुलही 'उत्कृष्टता केंद्र' आऊ 20 डेटा लैब, डेढ़ लाख सरकारी करमचारी मन बनहीं स्मार्ट
रायपुर। आज के जमाना ह टेक्नोलॉजी आऊ आर्टिफिशियल इंटेलिजेंस (AI) के जमाना हे, आऊ अब हमर छत्तीसगढ़ राज्य घलो ये मामला म देस के आगू बढ़इया राज्य मन के पांत म खड़ा होए बर तइयार हो गे हे। छत्तीसगढ़ म AI तकनीक ल बढ़ावा देए बर 'छत्तीसगढ़ एआई मिशन' के पहिली स्टीयरिंग कमेटी के बइठक ह मुख्य सचिव श्री विकासशील के अगुवई (अध्यक्षता) म पूरा होइस। ये महत्वपूर्ण बइठक म पूरा प्रदेश म आर्टिफिशियल इंटेलिजेंस के विस्तार करे, नवा-नवा तकनीकी खोज (नवाचार) ल आगू बढ़ाए आऊ AI के मदद ले सरकारी कामकाज (सुशासन) ल अऊ जादा चुस्त-दुरुस्त बनाए बर अब्बड़ बड़े आऊ जरूरी निर्णय ले गिस।
पांचों संभाग म खुलही 5 'सेंटर ऑफ एक्सीलेंस' आऊ 20 AI डेटा लैब
सरकार के ये नवा योजना के तहत पहिलीच बछर म छत्तीसगढ़ के पांचों संभाग- रायपुर, दुर्ग, बिलासपुर, सरगुजा आऊ बस्तर म 5 ठन 'सेंटर्स ऑफ एक्सीलेंस' (उत्कृष्टता केंद्र) खोले जाही। येखर संग म प्रदेश भर म 20 ठन अत्याधुनिक AI डेटा लैब्स घलो स्थापित करे जाही। ये सेंटर मन के खुले ले सिरिफ रायपुर-बिलासपुर जइसन बड़े सहरच म नहीं, बल्कि बस्तर आऊ सरगुजा जइसन आदिवासी आऊ दूरस्थ अंचल के लइका मन ल घलो बड़े सहर के बरोबर हाईटेक सुविधा आऊ आधुनिक तकनीक सीखे के मउका अपन घर के तीर म मिल सकही।
1.5 लाख सरकारी अधिकारी आऊ करमचारी मन ल मिलही AI के ट्रेनिंग
सरकारी दफ्तर मन के कामकाज ल आसान बनाए आऊ आम जनता ल सरकारी योजना के फायदा जल्दी दिलाए बर प्रशासनिक काम म AI के भरपूर उपयोग करे जाही। येखर बर प्रदेश के 1 लाख 50 हजार (1.5 लाख) सरकारी अधिकारी आऊ करमचारी मन ल AI चलाए आऊ समझे के ट्रेनिंग (प्रशिक्षण) दे जाही। ये महाअभियान के पहिली चरण म 15 हजार सरकारी सेवक मन ल बिसेस रूप ले प्रशिक्षित करे जाही, ताकि दफ्तर मन म फाइल के काम ह बिना कोनो देरी के फटाफट आऊ पारदर्शिता के संग पूरा हो सकय।
स्कूल आऊ कॉलेज के लइका मन बर खुलही तरक्की के नवा रद्दा
छत्तीसगढ़ एआई मिशन ह सिरिफ सरकारी दफ्तर तक सीमित नइ रहय, बल्कि येखर ले प्रदेश के पढ़इया लइका आऊ जुवा (युवा) मन के भविष्य ल घलो संवारे जाही। स्कूल म पढ़इया लइका मन, जुवा साथी आऊ टेक्निकल (तकनीकी) शिक्षा लेवइया विद्यार्थी मन बर AI आधारित नवा पाठ्यक्रम (सिलेबस) तइयार करे जाही। येखर संग म डिजिटल ट्रेनिंग सामग्री, नवा खोज (अनुसंधान) करे के सुविधा आऊ फेलोशिप के सुग्घर मउका घलो विकसित करे जाही। ये कदम ले छत्तीसगढ़ के लइका मन ह दुनिया भर म चलत नवा टेक्नोलॉजी के संग कदम मिलाके चल सकहीं आऊ ओमन ल बड़े-बड़े कंपनी म नौकरी पाए म आसानी होही।
सीएम विष्णु देव साय के अगुवई म डिजिटल क्रांति डहर बढ़त छत्तीसगढ़
मुख्यमंत्री श्री विष्णु देव साय के कुशल नेतृत्व म छत्तीसगढ़ के सुशासन सरकार ह तकनीक आधारित कामकाज, नवाचार आऊ डिजिटल सशक्तिकरण के दिसा म रोज नवा-नवा कीर्तिमान गढ़त हे। सरकार के उद्देश्य हे कि आधुनिक तकनीक के फायदा ह समाज के आखरी व्यक्ति तक पहुंचय आऊ हमर छत्तीसगढ़ ह डिजिटल इंडिया के नक्शा म एक ठन मजबूत आऊ आधुनिक राज्य बनके उभरय।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।