छत्तीसगढ़ के जनजातीय वीर: शहीद वीर नारायण सिंह, शहीद वीर गेंदसिंह, वीर गुण्डाधूर, शहीद नांगूल दौरला

छत्तीसगढ़ के ये पावन माटी अपन प्राकृतिक सुंदरता अउ समृद्ध संस्कृति बर ही नइ जाने जावय, बल्कि एहा महान स्वतंत्रता सेनानी अउ जनजातीय वीर मन के अदम्य साहस, स्वाभिमान अउ बलिदान के गवाह घलो रहिस हे। अमर शहीद जऊन मन विदेशी शासन, शोषण अउ अन्याय के खिलाफ डट के ऐतिहासिक क्रांति के अगुआइ करिस। बस्तर ले लेके सोनाखान तक, छत्तीसगढ़ के ये वीर सपूत मन जल, जंगल अउ जमीन के रखवारी बर अपन परान के आहुति दे दीन। आवा, छत्तीसगढ़ के ये महान क्रांतिकारी मन के संघर्ष ला विस्तार ले जानथन:

1. शहीद वीर नारायण सिंह (सोनाखान क्रांति, 1857)

सोनाखान के लोकप्रिय जमींदार वीर नारायण सिंह 1857 के पहिली स्वतंत्रता संग्राम के बेरा म छत्तीसगढ़ के पहिली शहीद बनिन। जब म भयंकर अकाल परिस, तब वो ह एक व्यापारी के अनाज गोदाम खुलवा के भूखाय प्रजा मन म अनाज बांटीन। गरीब अउ असहाय मन के मसीहा बनके वीर नारायण सिंह ह अंग्रेज मन के दमनकारी नीति के खिलाफ सशस्त्र संघर्ष के बिगुल फूंक दिस। आखिरकार, 10 दिसंबर 1857 के रायपुर म सरेआम फांसी म लटका के बलिदान दीन, फेर वोकर ये बलिदान आज घलो छत्तीसगढ़ के घर-घर अउ जन-जन के हिरदय म अमर हे।

2. शहीद वीर गेंदसिंह (परलकोट क्रांति, 1824–25)

बस्तर के पहिली शहीद अउ परलकोट के भूमिया राजा वीर गेंदसिंह ह मराठा अउ अंग्रेज मन के संयुक्त शोषण के खिलाफ आवाज उठाईन। वो ह अबूझमाड़िया अउ हलबा जनजाति ला संगठित करके विदेशी सत्ता के दांत खट्टा कर दीन। अपन मातृभूमि के स्वतंत्रता के रखवारी करत-करत वो ह 20 जनवरी 1825 के सर्वोच्च बलिदान दीन, जऊन बस्तर के इतिहास के एक स्वर्णिम अउ विद्रोही अध्याय बनगे।

3. वीर गुण्डाधूर (भूमकाल क्रांति, 1910)

सन 1910 के ऐतिहासिक 'भूमकाल क्रांति' के नायक वीर गुण्डाधूर नेतानार के धुरवा जनजाति ले रिहिन, जेन ला लोगन मन आदर ले "बाघा" घलो कहिथे। अंग्रेज मन के कड़क वन नीति अउ बेगारी प्रथा के खिलाफ वो ह 'डारा मिरी' भेज के गांव-गांव ला एकजुट करिस अउ औपनिवेशिक शासन के नींव ला हिला दिस। वोकर अगुआई जनजातीय समाज के एकजुटता अउ संगठन क्षमता के अद्भुत मिसाल आए।

4. शहीद नांगूल दौरला (कोई/कोया क्रांति, 1859)

दक्षिण बस्तर म बछर 1859 म होए 'कोया क्रांति' के प्रमुख नायक शहीद नांगूल दौरला रिहिन। जब अंग्रेज मन डहर ले दक्षिण बस्तर म साल मन के अंधाधुंध कटाई करे गीस, तब वो ह एकर विरोध म एक जबरदस्त नारा दिस- "एक साल वृक्ष के पीछे एक व्यक्ति के सिर"। वोकर अगुआई अउ तेज संघर्ष के आगू अंग्रेज मन ला झुके बर परिस अउ आखिर म ओमन ला लकड़ी के ठेकेदारी बंद करे बर परिस।

छत्तीसगढ़ के ये जनजातीय वीर मन के संघर्ष खाली सत्ता परिवर्तन के लड़ाई नइ रिहिन, बल्कि यह जल, जंगल, जमीन, संस्कृति अउ मानवीय मूल्य मन के रखवारी के एक महान नैतिक लड़ाई रिहिस। 'जनजातीय गौरव दिवस' के पावन बेरा म ये अमर सेनानी मन के जीवन अउ ओकर योगदान ला सुरता करना हमर संस्कृति अउ स्वाभिमान ला नमन करना आय। ओकर ये वीर गाथा मन आने वाला पीढ़ी ला हमेसा देशप्रेम अउ अन्याय के खिलाफ खड़े होए के प्रेरणा देत रही।

अंजोर: छत्तीसगढ़ी समाचार

संपादक/अनुवादक: जयंत साहू (9826753304)