नामकरण विवाद: छत्तीसगढ़िया क्रान्ति सेना के उग्र अल्टीमेटम, पुरखा के धरोहर अउ मौलिक पहिचान संग छेड़छाड़ मंजूर नइ

रायपुर, 11 नवंबर 2026: राजधानी रायपुर के ऐतिहासिक कटोरा तालाब के नांव ला बदलके 'झूलेलाल सरोवर' रखे के मामला अब गरमाए हावय। ए मामला म छत्तीसगढ़िया क्रान्ति सेना ह नगर निगम आयुक्त ल कड़ा अल्टीमेटम दे हावय। संगठन ह चेतावत केहे हावय कि तालाब म लिखे 'झूलेलाल सरोवर' के नांव ला तुरते नइ हटाए गीस, त छत्तीसगढ़िया क्रान्ति सेना रायपुर जिला ह उग्र प्रदर्शन करही अउ निगम के घेराव करही।

एखर संग ही, छत्तीसगढ़िया क्रान्ति सेना ह आने वाला बिहार के 'छठ पर्व' ले पहिली, छत्तीसगढ़ के पुरखा बनाए गे तालाब मन के मौलिक पहिचान अउ ऐतिहासिक नांव मन संग छेड़छाड़ ऊपर कड़ा रोक लगाय के मांग करे हावय।

ऐतिहासिक धरोहर अउ जलस्रोत के मौलिक नांव बदले के विरोध

छत्तीसगढ़ के ऐतिहासिक तालाब मन अउ नदी घाट मन के मूल नांव ला बदलके दूसर नांव रखे के कुत्सित प्रयास मन के विरोध म छत्तीसगढ़िया क्रान्ति सेना ह आज निगम आयुक्त ल ज्ञापन सौंप के अइसे जम्मो नामकरण ऊपर तत्काल रोक लगाय के मांग करे हावय।

संगठन ह ज्ञापन के माध्यम ले प्रशासन के ध्यान खींचत कहिगे हावय कि छत्तीसगढ़ के अलग-अलग तालाब मन अउ नदी घाट मन के अपन खुद के एक ऐतिहासिक, सांस्कृतिक अउ पारंपरिक पहिचान होथे। ए जलस्रोत के नांव ए माटी के लोकसंस्कृति, स्थानीय परंपरा मन अउ हमारे पूर्वज मन के विरासत ले जुड़े हावय। अइसे बेरा म प्रदेश के कोनो घलो तालाब अउ नदी घाट के मूल नांव ला बदलके दूसर नांव रखे के प्रवृत्ति ऊपर तत्काल लगाम कसना चाही।

छठ पर्व के आड़ म पहिचान बदलय के विरोध

संगठन के ह कड़ा शब्द म कहे हावय कि "छठ पर्व" बिहार राज्य के एक महान पर्व ए, ये पर्व के आयोजन अउ धार्मिक आस्था के नांव म छत्तीसगढ़ के पारंपरिक तालाब अउ नदी घाट मन के मौलिक पहिचान अउ ऐतिहासिक नांव मन ला बदलना कतको ले उचित नइ ए।

छत्तीसगढ़िया क्रान्ति सेना के स्पष्ट कहना हावय कि प्रवासी मन डहर ले छठ पर्व मनाए बर प्रदेश के अलग-अलग जलस्रोत अउ घाट मन के उपयोग करे जा सके हे, ओखर बर ओमन के मूल नांव ला बदलके ‘छठ घाट’ नांवकरण करना छत्तीसगढ़ के पारंपरिक पहिचान अउ सांस्कृतिक विरासत के संरक्षण के दृष्टिकोण ले सरासर गलत हे।

छत्तीसगढ़िया समाज के ऐतिहासिक धरोहर ए तालाब

संगठन ह बताइस कि छत्तीसगढ़ के तालाब अउ नदी घाट सिरिफ पानी के स्रोत भर नइ हवे, बल्कि ए छत्तीसगढ़िया समाज के ऐतिहासिक अउ सांस्कृतिक धरोहर हावय। एखर मौलिकता अउ पारंपरिक नांव मन ला सुरक्षित रखना बहुत जरूरी हे, जेकर से आने वाला पीढ़ी घलो अपन सांस्कृतिक विरासत अउ ऐतिहासिक पहिचान ले परिचित हो सकय।

छत्तीसगढ़िया क्रान्ति सेना ह शासन-प्रशासन ले जोरदार मांग करे हावय कि प्रदेश के जम्मो तालाब अउ नदी घाट मन के मूल नांव ला बदले ऊपर रोक लगाय बर आवश्यक दिशा-निर्देश जारी किए जाए अउ छत्तीसगढ़ के मौलिक सांस्कृतिक पहिचान संग कोनो किसिम के खिलवाड़ करन दे जाए।

निगम ल अल्टीमेटम: बड़े आंदोलन के चेतावनी

संगठन ह कड़ा चेतावनी देत कहिगे हावय कि यदि कटोरा तालाब के नांव पट्टी ला नइ बदले गीस अउ तालाब मन अउ नदी घाट मन के मूल नांव मन ला बदले के कुप्रयास जारी रिहिथे, त छत्तीसगढ़िया क्रान्ति सेना ह छत्तीसगढ़ के सांस्कृतिक अस्मिता अउ मौलिक पहिचान के रक्षा बर लोकतांत्रिक तरीका ले बड़े आंदोलन करे बर बाध्य होही।

अंजोर: छत्तीसगढ़ी समाचार

संपादक/अनुवादक: जयंत साहू (9826753304)