छत्तीसगढ़ी सिनेमा ल मिलिस नवा स्टार: 'मोला लव होगे' ले आयुष राजवैद्य अउ तिरांजलि गोस्वामी के धमाकेदार एंट्री

अंजोर सिनेमा डेस्क। छत्तीसगढ़ी फिल्म इंडस्ट्री (Chhollywood) म नवा प्रतिभा मनके गजब दिन ले आगोरा रिहिसे, जेन अब आयुष अउ तिरांजलि के आये पूरा हो जही। ये कड़ी म 8 मई ले सिनेमाघर म प्रदर्शित होवइया फिल्म 'मोला लव होगे' ह खूब चर्चा म हे। ये फिल्म ले रायपुर के एक अइसे युवा कलाकार अपन फिल्मी सफर के शुरुआत करत हे, जेकर रग-रग म कला बसे हे- आयुष राजवैद्य। आयुष के संग नवोदित अदाकारा तिरांजलि गोस्वामी के जोड़ी ह पहिलि फिलिमले ही दर्शक मन के दिल जीतना शुरू कर दे हे।

कलाकार परिवार के 'नवा पीढ़ी' के आगाज

रायपुर के मशहूर आर्टिस्ट फैमिली ले ताल्लुक रखइया आयुष राजवैद्य के परिवार ह कला जगत म एक बड़े हस्ती के रूप म जाने जाथे। अपन माता-पिता ले मिले संस्कार अउ कला के विरासत ला आयुष ह अब बड़े पर्दा म 'नायक' बनके आगू बढ़ावत हे। 24 मई 2005 के जनमे आयुष के प्रारंभिक शिक्षा केन्द्रीय विद्यालय रायपुर ले होय हे, उहें कला के बारीकी मन ला उमन कमला देवी संगीत महाविद्यालय रायपुर ले सीखे हें।

एक मंझे हुए थियेटर आर्टिस्ट होय के नाते आयुष के कहना हे कि उंकर पैशन 'कहानियों को जीना' (Telling stories one role at a time) हे। इही सेती फिल्म के टीजर म उंकर अभिनय अउ एक्शन म परिपक्वता साफ झलकथे।

आयुष अउ तिरांजलि: कॉलेज लाइफ के मया अउ जबरदस्त एक्शन

'मोला लव होगे' म आयुष राजवैद्य अउ तिरांजलि गोस्वामी के जोड़ी ह एक कॉलेज मया-पिरित के कहानी ला जीवंत करे हे। तिरांजलि गोस्वामी घलो ये फिल्म ले अपन करियर के शुरुआत करत हे अउ उंकर सादगी भरे अभिनय ला गाना मन म लोगन मन ह काफी पसंद करे हे। फिल्म म जिहाँ आयुष अउ तिरांजलि के 'कोमल अहसास' दिखही, त उहें आयुष के जबरदस्त एक्शन अवतार घलो दर्शक मन ला रोमांचित करही। फिल्म के टीजर म आयुष ह एक मंझे हुए एक्शन हीरो जइसे तलवार अउ बंदूक के ललकार संग नजर आवत हें।

अनुभवी कलाकार मन के साथ

अनुमोद फिल्म्स के बैनर तले बने ये फिल्म के निर्माता अउ निर्देशक अनुमोद राजवैद्य हे। आयुष अउ तिरांजलि जइसे नवा कलाकार मन ला करण खान, रजनीश झांझी, पुष्पेन्द्र सिंह अउ संजय महानंद जइसे दिग्गज कलाकार मन के साथ मिले हे, जेकर ले फिल्म ह काफी मजबूत नजर आवत हे।

बहरहाल आयुष, तिरांजलि अउ पूरा 'मोला लव होगे' टीम ल अंजोर कोति ले हार्दिक बधाई अउ सफलता के सुभकामना। संगवारी हो ये सिनेमा समाचार बने लागिस होही त लाइक-शेयर अउ कमेंट जरूर करहू। जोहार छत्तीसगढ़।