अंजोर, रायपुर। छत्तीसगढ़ महतारी अउ छत्तीसगढ़ी भाखा के सेवा बर समर्पित ‘छत्तीसगढ़ राजभाषा आयोग’ डहर ले अवइया 11 मई, 2026 सोमवार के रायपुर जिला के साहित्यकार मन बर ‘जिला सम्मेलन’ के भव्य आयोजन करे जावत हे। ये कार्यक्रम रायपुर के सिविल लाइंस के न्यू सर्किट हाउस के कॉन्फ्रेंस हॉल में होही। सम्मेलन के मुख्य उद्देश्य छत्तीसगढ़ी भाखा के प्रचार-प्रसार अउ स्थानीय साहित्यकार मन ल एक मंच प्रदान करना हे, जेखर बर बिहनिया 10:00 बजे ले पंजीयन के प्रक्रिया शुरू हो जाही।
कार्यक्रम के प्रथम सत्र अउ उद्घाटन समारोह बिहनिया 11:00 बजे ले शुरू होही, जेमा प्रदेश के पर्यटन, संस्कृति अउ धर्मस्व मंत्री माननीय राजेश अग्रवाल ‘माई पहुना’ (मुख्य अतिथि) के रूप में सामिल होहीं। कार्यक्रम के अध्यक्षता रायपुर लोकसभा के सांसद माननीय बृजमोहन अग्रवाल करही। एखर संग ही रायपुर उत्तर के विधायक पुरंदर मिश्रा अउ धरसींवा विधायक अनुज शर्मा समेत शासन के कतको वरिष्ठ अधिकारी अउ साहित्यकार मन ‘खास सगा’ के रूप में मंच में बिराजमान रइही।
ये सम्मेलन में छत्तीसगढ़ी भाखा के सेवा करइया तीन प्रमुख साहित्यकार विजय मिश्रा ‘अमित’ (रायपुर), श्रीमती सुमन शर्मा बाजपेयी (रायपुर) अउ चन्द्रहास साहू (धमतरी) के विशेष सम्मान करे जाही। संग ही, राजभाषा आयोग डहर ले छपे आठ नवा किताब मन के विमोचन घलो होही। एमा डॉ. पीसी लाल यादव, डॉ. दीनदयाल साहू अउ श्री पुनीत गुरूवंश जइसे बड़का लेखक मन के पांडुलिपि मन ल लोक अर्पित करे जाही, जेखर ले छत्तीसगढ़ी साहित्य के भंडार अउ समृद्ध होही।
मंझनिया के दूसर सत्र में ‘गोठ-बात’ अउ चर्चा गोष्ठी के आयोजन होही, जेखर विषय ‘स्व. सुशील भोले के व्यक्तित्व अउ कृतित्व’ ऊपर आधारित रही। एमा डॉ. पीसी लाल यादव अउ श्री प्रभात मिश्रा जइसे विद्वान मन अपन विचार रखही। एखर बाद जम्मो पहुना अउ साहित्यकार मन बर जेवन के व्यवस्था करे गे हे। कार्यक्रम के समापन बेरा में मंझनिया 3:00 बजे ले संझा 6:00 बजे तक एक भव्य ‘छत्तीसगढ़ी कवि सम्मेलन’ होही, जेमा प्रदेश भर के आमंत्रित कवि मन अपन रचना ले समा बांधही।
छत्तीसगढ़ी भाषा के वेब साईट 'अंजोर' (www.anjor.online) संपादक जयंत साहू डहर ले सम्मानित होवइया सबो साहित्यकार मन ल बथाई।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।