मुख्यमंत्री विष्णुदेव साय के अगुवाई म प्रदेस म प्रधानमंत्री आवास योजना-ग्रामीण के प्रभावी क्रियान्वयन ल नवा गति मिले हावय। राज सासन डहर ले वित्तीय बछर 2026-27 म प्रधानमंत्री आवास योजना-ग्रामीण (PMAY-G) के अंतर्गत आवास निरमान काम म तेजी लाए के उद्देस्य ले राज के जम्मो जिला मन ल 2677.15 करोड़ रुपिया के केंद्रीय अउ राज्यांश रासि जारी करे गे हावय। ये रासि एसएनए स्पर्श (SNA SPARSH) मॉड्यूल के माध्यम ले जिला मन ल बांटे गे हावय, ताकि पात्र हितग्राही मन के आवास निरमान काम समय म अउ पारदर्शी तरीका ले पूरा करे जा सकय।
मुख्यमंत्री विष्णुदेव साय ह कहिन के प्रधानमंत्री श्री नरेंद्र मोदी जी के अगुवाई म “हर गरीब ल पक्का घर” के संकल्प छत्तीसगढ़ म तेजी ले साकार होवत हे। हमर सरकार ये सुनिस्चित करे बर प्रतिबद्ध हे के प्रदेस के कोनो भी पात्र परिवार पक्का आवास जइसे बुनियादी सुविधा ले वंचित झन राहय। पक्का घर सिरिफ चार दीवाल नो हे, भलुक एक परिवार के सम्मान, सुरक्छा, स्थायित्व अउ बेहतर भविस्स के मजबूत नेव आय।
मुख्यमंत्री श्री साय ह कहिन के प्रदेस म प्रधानमंत्री आवास योजना-ग्रामीण के तहत आवास निरमान के काम तेजी ले संचालित करे जावत हे। राज म रोज 1600 ले जादा पक्का आवास के निरमान करे जावत हे अउ बीते अढ़ाई बछर म 10.60 लाख ले जादा आवास पूरा कराए जा चुके हे। वित्तीय बछर 2025-26 म ही 6 लाख ले जादा आवास मन के निरमान करके छत्तीसगढ़ देस के आघू के राज मन म सामिल रहे हे। उमन कहिन के ये उपलब्धि सिरिफ आंकड़ा नो हे, भलुक लाखन गरीब परिवार मन के सपना, आत्मसम्मान अउ सुरक्छित जीवन के कहानी आय।
मुख्यमंत्री श्री साय ह अधिकारी मन ल निर्देस दे हें के जारी रासि के उपयोग प्रधानमंत्री आवास योजना-ग्रामीण के दिसा-निर्देस के मुताबिक करत पात्र हितग्राही मन के आवास जल्दी पूरा कराए जाय, ताकि हर जरूरत वाले परिवार ल समय म सुरक्छित अउ सम्मानजनक पक्का आवास उपलब्ध कराए जा सकय।
मुख्यमंत्री श्री साय ह कहिन के योजना के क्रियान्वयन म महिला स्व-सहायता समूह मन के महत्वपूर्ण भूमिका रहे हे। प्रदेस म हजारन स्व-सहायता समूह सामगरी आपूर्ति ले जुड़ के आजीविका कमावत हें, एमा ले 10 हजार ले जादा महिला मन 'लखपति दीदी’ बने हें। उमन कहिन के ये योजना सिरिफ आवास निरमान तक सीमित नइ हे, भलुक महिला ससक्तीकरन, आजीविका संवर्धन अउ सामाजिक परिवर्तन के घलो माध्यम बनत हावय।
मुख्यमंत्री श्री साय ह कहिन के राज सरकार आत्मसमर्पित नक्सली अउ नक्सल प्रभावित परिवार मन ल विकास के मुख्यधारा ले जोड़े बर घलो संवेदनसीलता के साथ काम करत हे। अइसन परिवार मन ल पक्का आवास उपलब्ध कराके उंकर जीवन म सुरक्छा, स्थायित्व अउ बिस्वास के नवा वातावरण तइयार करे जावत हे।
उमन कहिन के प्रदेस म नवाचार के तहत 1.5 लाख ले जादा आवास मन म रेन वाटर हार्वेस्टिंग सिस्टम विकसित करे गे हावय, जेकर ले जल संरक्छन ल बढ़ावा मिलत हे। संग ही हितग्राही मन के सिकायत के तुरते निराकरन बर टोल फ्री हेल्पलाइन नंबर 1800-233-1290 संचालित करे जावत हे अउ योजना म पारदर्सिता सुनिस्चित करे बर ग्राम पंचायत मन म क्यूआर (QR) कोड घलो प्रदरसित करे गे हावय।
मुख्यमंत्री श्री साय ह कहिन के हमर सरकार सुसासन, पारदर्सिता अउ संवेदनसीलता के साथ अंतिम मनखे तक योजना मन के लाभ पहुंचाए बर प्रतिबद्ध हावय।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।