रायपुर, 08 अप्रैल 2026 । छत्तीसगढ़ में चलत स्वामी आत्मानंद उत्कृष्ट अंग्रेजी अउ हिन्दी माध्यम स्कूल मन के पढ़ई-लिखई के काम ल अउ जादा असरदार अउ गुनबत्ता वाले बनाय के खातिर, प्राचार्य मन के राज स्तरीय बइठक के आयोजन 09 अप्रैल 2026 के मंझनिया के पं. दीनदयाल ऑडिटोरियम, साइंस कॉलेज ग्राउंड, रायपुर में करे जाही। ए बइठक स्कूल शिक्षा मंत्री गजेंद्र यादव के अध्यक्षता में होही, जेमा पूरा प्रदेश के लगभग 751 स्कूल के प्राचार्य मन सामिल होही।
बइठक में आघू के शिक्षा सत्र बर बोर्ड परीक्षा के रिजल्ट के लक्ष्य तय करे, नीट (NEET) अउ जी (JEE) जइसन प्रतियोगिता परीक्षा मन में लइका मन के भागीदारी अउ सफलता बढ़ाय के रणनीति, भरती (प्रवेश) प्रक्रिया, अंग्रेजी भासा में सुधार के कोसिस, पीटीए (PTA) बइठक मन के समीक्षा अउ सियान-अधिकारी मन के भूमिका उपर गोठ-बात करे जाही। उहें, खेल-कूद अउ दूसर गतिविधि मन के उपलब्धि, स्कूल मन में नीक माहौल बनाय, स्मार्ट क्लास अउ लाइब्रेरी के उपयोग, पढ़ई के गुनबत्ता में सुधार अउ नवाचार जइसन जरूरी बिसय मन उपर बिस्तार से चरचा करे जाही।
लोक शिक्षण संचालनालय कोति ले जम्मो जिला शिक्षा अधिकारी मन ल निरदेस दे गे हे कि ओमन अपन-अपन जिला के जम्मो संबंधित प्राचार्य मन के उपस्थिति पक्का करंय।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।