छत्तीसगढ़ी भासा के मान बर हुंकार: जनगणना म जगा नइ मिलिस त होही उग्र आंदोलन अउ बहिष्कार

छत्तीसगढ़ी अस्मिता अउ महतारी भासा के मान-सम्मान के रक्षा बर कोरबा के धरती म एक नवा इतिहास रचे गिस। जोहार छत्तीसगढ़ पार्टी (JCP) अउ छत्तीसगढ़िया क्रान्ति सेना ह संयुक्त रूप ले हुंकार भरत, सैंकड़ों कार्यकर्ता मन के संग रैली निकाल के कलेक्टर महोदय ल भारत सरकार के नांव म ज्ञापन सउंपिन। संगठन के एकेच मांग हे कि "2026-27 के जनगणना म छत्तीसगढ़ी भासा ला अनिवार्य रूप ले शामिल करे जाय।"

विदेशी भासा ला जगा, फेर "राजभासा" उपेक्षित काबर?

ज्ञापन सउंपत जोहार छत्तीसगढ़ पार्टी के जिला अध्यक्ष जैनेन्द्र कुर्रे अउ छत्तीसगढ़िया क्रान्ति सेना के जिला अध्यक्ष सुरजीत सोनी ह कड़ा आपत्ति जतावत कहिन कि छत्तीसगढ़ी भासा ह सिरिफ़ एक बोली नई हे, ये ह 3.5 करोड़ छत्तीसगढ़िया मन के प्राण हे। ओमन कहिन कि स्व-जनगणना पोर्टल म नेपाली जइसे विदेशी भासा अउ अंग्रेजी ला जगा दे गे हे, फेर छत्तीसगढ़ के राजभासा "छत्तीसगढ़ी" ला दरकिनार कर दिय गे हे। छत्तीसगढ़ी के व्याकरण हिंदी ले घलो पहिली (सन 1885/1890) म लिखे जा चुके हे, फेर आज घलो एकर उपेक्षा करना भासा के अपमान हे।

'जबर चिठ्ठी' अभियान: प्रधानमंत्री ला लिखे जाही पत्र

छत्तीसगढ़ी भासा ल संविधान के 8वीं अनुसूची म सामिल करे बर अब व्यापक रूप ले 'जबर चिठ्ठी' अभियान चलाय जाही। एकर तहत प्रधानमंत्री नरेंद्र मोदी जी ला लाखों के संख्या म पत्र लिखके छत्तीसगढ़ी के संवैधानिक हक मांगे जाही। संगठन के पदाधिकारी मन के कहना हे कि सिंधी, संस्कृत अउ नेपाली भासा बोलइया मन ले कतको गुना जादा जनसंख्या छत्तीसगढ़ी भासा भाषी मन के हे, त फेर एकर हक काबर मारे जावत हे?

जनगणना बहिष्कार के चेतावनी

सासन-प्रसासन ला चेतावत संगठन ह कहिन कि यदि जनगणना 2026-27 म छत्तीसगढ़ी भासा ला जगा नइ मिलिस, त पूरा प्रदेश म जनगणना के बहिष्कार करे जाही। ये लड़ाई अब अस्मिता के लड़ाई बन चुके हे। छत्तीसगढ़िया मन अब अपन भासा के उपेक्षा बर चुप नइ बईठय, जरूरत पड़िस त उग्र प्रदर्शन घलो करे जाही जेकर जिम्मेदार स्वयं सासन-प्रसासन होही।

सैकड़ों सेनानी मन के रहिस उपस्थिति

ये ऐतिहासिक रैली म मुख्य रूप ले जोहार छत्तीसगढ़ पार्टी अउ छत्तीसगढ़िया क्रान्ति सेना के सैंकड़ों जुझारू पदाधिकारी मन सामिल होइन। जेमा जिला सचिव डॉ. महावीर यादव, संगठन मंत्री सुरेश पटेल, जिला मंत्री नोभीत साहू, देवहंस, शहर अध्यक्ष हरि चौहान अउ महिला जिला अध्यक्ष चंचल महंत मौजूद रहिन। साथ ही क्रान्ति सेना कोती ले ओम केवट, राकेश यादव, राकेश सूर्यवंशी समेत जिला भर के कार्यकर्ता मन अपन भासा अउ माटी बर डटे रहिन।

समाचार स्रोत: जोहार छत्तीसगढ़ पार्टी अउ छत्तीसगढ़िया क्रान्ति सेना, जिला-कोरबा (छ.ग.)