रायपुर। छत्तीसगढ़िया क्रांति सेना के संरक्षक, दादा रामगुलाम ठाकुर ह रायपुर लोकसभा के सांसद बृजमोहन अग्रवाल ले मुलाकात करिन। ये मुलाकात मा दादा ठाकुर ह प्रदेश के ओ गरीब जनता के पक्ष ल मजबूती ले राखिन, जेकर रोजी-रोटी ऊपर आज संकट के बादर मंड़रावत हे। सहर मन मा होवत कार्रवाई ले छोटे व्यापारी मन भारी हलाकान हें।
मुद्दा के गंभीरता ल देखत हुए, दादा ठाकुर ह सांसद महोदय ल बताइन कि कइसन तहर ले पूरा प्रदेश मा नगर निगम मन डहार ले रेहड़ी-पटरी (ठेला) अउ छोटे दुकानदार मन के संग दुर्व्यवहार करे जावत हे। विकास के नांव मा गरीब मन के व्यापार ल उजाड़े के कार्रवाई ऊपर सेना ह गहरी चिंता व्यक्त करे हे।
मुलाकात के दौरान दादा ठाकुर ह स्पष्ट सब्द मा कहिन कि विकास के नांव मा गरीब मन के पेट काटना कतको तहर ले न्यायसंगत नो हे। जे मनखे मन ईमानदारी ले मेहनत मजदूरी करके अपन परिवार पालत हें, ओमन ऊपर अइसन अत्याचार कतई बर्दाश्त नहीं करे जाही। शासन-प्रशासन ल गरीब मन के हित मा सोचना चाही।
छत्तीसगढ़िया क्रांति सेना ह सांसद महोदय ले मांग करे हे कि सहर ल सुग्घर बनाय के आड़ मा छोटे व्यापारी मन ल बेदखल झन करे जाय। उमन ल व्यवस्थित जगह दिये जाय ताकि ओमन अपन गुजर-बसर कर सकें। बिना कोनो विकल्प दिये ओमन के रोजी-रोटी छीनना अमानवीय आय।
सांसद श्री बृजमोहन अग्रवाल जी ल ये विकट समस्या ले अवगत करावत हुए, दादा ठाकुर ह मांग करिन कि ये मामला मा वो ह तुरंते हस्तक्षेप करंय। गरीब जनता ल न्याय दिलाय बर शासन डहार ले उचित निर्देश जारी होना चाही, ताकि कोनो भी निगम प्रशासन मनमानी झन कर सके।
मुलाकात के अंत मा ये भरोसा जताय गिस कि सांसद महोदय छत्तीसगढ़िया मन के ये पीरा ल समझिहीं अउ जल्द ही कोनो ठोस निर्णय लेवाहिं। क्रांति सेना ह साफ कर दे हे कि जब तक गरीब मन ल न्याय नहीं मिलही, तब तक उमन अपन हक बर आवाज उठावत रहिहीं।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।