श्रीमती लक्ष्मी वर्मा ह मुख्यमंत्री विष्णुदेव साय के उपस्थिति में ग्रहण करिन राज्यसभा निर्वाचन प्रमाण पत्र

​छत्तीसगढ़ के राजनीति बर आज एक ऐतिहासिक दिन रहिस। श्रीमती लक्ष्मी वर्मा ह राज्यसभा सांसद के रूप में निर्वाचित होय के बाद, आज प्रदेश के यशस्वी मुख्यमंत्री आदरणीय श्री विष्णुदेव साय जी के गरिमामयी उपस्थिति में अपन निर्वाचन प्रमाण पत्र ग्रहण करिन। ए मौका में मुख्यमंत्री ह श्रीमती वर्मा ल बधाई देवत उंखर उज्ज्वल कार्यकाल के कामना करिन।

​राजधानी रायपुर में आयोजित ए कार्यक्रम में भारी उत्साह देखन ल मिलिस। प्रमाण पत्र ग्रहण करे के बाद श्रीमती लक्ष्मी वर्मा ह कहिन कि "ए ऐतिहासिक बेरा में छत्तीसगढ़ के जम्मो क्षेत्रवासी, देवतुल्य कार्यकर्ता अउ शुभचिंतक मन जउन मया अउ आशीर्वाद दे हें, ओखर बर मैं हृदय से आभार व्यक्त करत हौं।" ए अवसर पर भाजपा के कतकोन दिग्गज नेता अउ कार्यकर्ता मन घलो मौजूद रहिन।

​श्रीमती लक्ष्मी वर्मा ह अपन बात ल आगू बढ़ावत कहिन कि जनसेवा के ए नवा अध्याय ह जनता के अटूट विश्वास के ही प्रतिफल आय। उमन भरोसा दिलवाईन कि राज्यसभा में छत्तीसगढ़ के आवाज ल बुलंदी के साथ उठाही अउ प्रदेश के विकास बर निरंतर काम करत राही। कार्यकर्ता मन के मेहनत अउ जनता के भरोसा ल ही उमन अपन असली ताकत बताईन।

​पूरा प्रदेश ले श्रीमती लक्ष्मी वर्मा ल बधाई देहे बर मनखे मन के तांता लगे हे। सोशल मीडिया ले लेके जमीनी स्तर तक कार्यकर्ता मन में भारी खुशी के माहौल हे। ए ऐतिहासिक उपलब्धि बर 'अंजोर छत्तीसगढ़ी' वेबसाइट के संपादक जयंत साहू ह घलो श्रीमती लक्ष्मी वर्मा ल हार्दिक बधाई अउ उज्ज्वल भविष्य बर शुभकामना प्रेषित करिन।