रायपुर: छत्तीसगढ़ के गौरव ला नवा ऊँचाई देवत, रायपुर के साइंस कॉलेज मैदान में 'खेलो इंडिया नेशनल ट्राइबल गेम्स' के भव्य शुभारंभ सांस्कृतिक कार्यक्रम के संग संपन्न होइस। ए बड़का आयोजन में प्रदेश के कैबिनेट मंत्री गजेंद्र यादव जी ह विशेष रूप ले शामिल होके खिलाड़ी मनके उत्साहवर्धन करिन अउ ओमन के उज्ज्वल भविष्य बर सुभकामना दीन।
कार्यक्रम के बेरा में गजेंद्र यादव जी ह कहिन कि 'खेलो इंडिया' के माध्यम ले आयोजित ये खेल प्रतियोगिता हमर प्रदेश के आदिवासी प्रतिभा मन ला एक ठन मजबूत मंच प्रदान करही। ए मंच ले हमर जनजातीय क्षेत्र के लइका मन राष्ट्रीय स्तर तक अपन पहिचान बनाहीं अउ प्रदेश के नाम रोशन करहीं।
ए गौरवशाली कार्यक्रम में केंद्रीय खेल अउ युवा मामला के मंत्री माननीय डॉ. मनसुख मांडविया जी अउ प्रदेश के मुख्यमंत्री माननीय श्री विष्णुदेव साय जी के गरिमामय उपस्थिति रहिस। संग में उपमुख्यमंत्री श्री अरुण साव जी, कैबिनेट मंत्री श्री रामविचार नेताम जी, श्री राजेश अग्रवाल जी घलो उपस्थित रहिन।
आयोजन के सराहना करत हुए पहुना मन कहिन कि आदरणीय प्रधानमंत्री श्री नरेंद्र मोदी जी के नेतृत्व में दुरिहा इलाका के खेल प्रतिभा मन ला तराशे के काम करे जावत हे। ए मौका म विधायक श्री सुनील सोनी, श्री अनुज शर्मा, श्री पुरंदर मिश्रा, श्री मोतीलाल साहू, महापौर श्रीमती मीनल चौबे, अउ जिला पंचायत अध्यक्ष श्री नवीन अग्रवाल समेत भारी संख्या में अधिकारी अउ खिलाड़ी मन उपस्थित रहिन।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।