रायपुर। छत्तीसगढ़ी सिनेमा (छॉलीवुड) म अब डर अउ रोमांच के नवा जुग सुरू होने वाला हे। 'आकृति फिल्म हाउस' के बैनर तले बने छत्तीसगढ़ी हॉरर फिल्म 'बलि' के आधिकारिक पोस्टर जारी कर दे गे हे। पोस्टर के जारी होतेच ले ही दर्शक मन म भारी उत्सुकता देखे बर मिलत हे। ये फिल्म ह आने वाला 19 जून 2026 के सिनेमाघर मन मा रिलीज होही।
डर शुरू : पोस्टर म दिखिस खौफनाक मंजर
फिल्म के पोस्टर ह देखत ले ही रोंगटे खड़ा कर देथे। पोस्टर म एक डरावना पंजा एक नोनी कोती बढ़त दिखत हे, जउन फिल्म के डरावना कहानी कोती इशारा करथे। पोस्टर म लिखे हे- "डर होगा शुरू" अउ "अब होगी डर के शुरुआत"। दीपक जायसवाल ह ए फिल्म ला प्रस्तुत करे हे।
मझे हुए कलाकार अउ टीम
ए फिल्म के कहानी अउ निर्देशन गंगासागर पंडा ह करे हे। सह-निर्माता के रूप मा सीमा आकाश वर्मा अउ सुरेन्द्र निषाद ह अपन जिम्मेदारी निभाय हे। फिल्म मा छत्तीसगढ़ के मंझे हुए कलाकार मन अपन अभिनय के जोहर देखाही।
- कलाकार: अनुराग, सौरभ, तोषांत-मोनिका, अनुग्रह गीडोन, गंगासागर पंडा, मोनिका वर्मा, नवीन देशमुख, वेद प्रकाश नांगची, लक्की कोष्टा।
- संगीत: प्रफुल्ल बेहरा के सुघर संगीत एमा सुने बर मिलही।
- गीतकार: अनुराग-सौरभ, तोषांत-मोनिका अउ अनुग्रह।
तकनीकी टीम के मेहनत
फिल्म ल तकनीकी रूप ले मजबूत बनाय बर अनुराग निर्मलकर (DOP), गौरांग त्रिवेदी (एडिटर), अउ आशीष कश्यप (कार्यकारी निर्माता) ह दिन-रात एक करे हन। फिल्म के सुघर प्रस्तुति बर तरुण देवांगन ह एसोसिएट प्रोड्यूसर के भूमिका निभाय हे।
छत्तीसगढ़ी सिनेमा म अइसन हॉरर फिल्म मन के आवई ले दर्शक मन ला कुछ नवा अउ रोमांचक देखे बर मिलही। अब देखना ये हे कि 19 जून के 'बलि' ह दर्शक मन ला कतका डरा पाही।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।