लाभांडी ले सरोना तक सर्विस लेन चौड़ीकरण ल मिलिस मंजूरी

रायपुर के लोगन मन अऊ मुंबई-कोलकाता राष्ट्रीय राजमार्ग-53 म चलइया मन खातिर बर बड़ राहत के खबर आए हे। भारतीय राष्ट्रीय राजमार्ग प्राधिकरण (NHAI) ह सरोना ले लाभांडी तक सर्विस लेन ला चउड़ा करे के मंजूरी दे दे हे। लगभग 100 करोड़ रूपया के लागत ले 14.25 किलोमीटर लम्बाई म सड़क के दूनों कोति के सर्विस लेन ला अब 10-10 मीटर चउड़ा करे जाही, जेकर ले गाड़ी मन के आवाजाही म आसानी होही।

उप मुख्यमंत्री अरुण साव ह ए बड़े काम के स्वीकृति बर केंद्र सरकार अऊ केंद्रीय मंत्री नितिन गड़करी के आभार मानिन हे। उमन कहिन कि सर्विस रोड के चउड़ा होय ले रायपुर शहर के भीतर के यातायात सुगम हो जाही अऊ जाम के झंझट ले मुक्ति मिलही। ए परियोजना ले शहर के भीतर अऊ बाहर, दूनों कोति सुरक्षित अऊ व्यवस्थित यातायात मुहैया कराना हमर प्राथमिकता आय।

ए सड़क के चउड़ा होय ले लाभांडी, तेलीबांधा, पचपेड़ी नाका, संतोषी नगर, भाठागांव बस स्टैंड अऊ सरोना जइसन इलाका मा रहइया मन ला बड़ फायदा होही। अभी ए रद्दा मा दिन-रात भारी गाड़ी मन के दबाव रहिथे, जेकर ले जाम लगथे अऊ एक्सीडेंट के डर बने रहिथे। सर्विस लेन के चउड़ाई दुगुना होय ले अब स्थानीय व्यापारी मन ला सामान उतारे-चढ़ाए मा सुविधा होही अऊ लोगन मन के समय घलो बाचही।

खास बात ये हे कि ए काम बर कोनो नवा जमीन लेय के जरूरत नहीं पड़ही, काबर कि एनएचएआई मेर पहिली ले पर्याप्त जमीन हे। काम ला जल्दी सुरू करे बर छत्तीसगढ़ स्टेट पावर ट्रांसमिशन कंपनी ह सड़क के बिजली खंभा मन ला हटाय के काम पहिली करही। जइसे ही बिजली खंभा मन ला शिफ्ट करे जाही, एनएचएआई ह सड़क चउड़ीकरण के सिविल काम ला सुरू कर दिही।