रायपुर साहित्य उत्सव के तारीख म सवाल: गणतंत्र दिवस के तैयारी के बीच कइसे शामिल हो पाही लाभार्थी?

छत्तीसगढ़ के राजधानी में आघू 23, 24 अउ 25 जनवरी 2026 के होवइया 'रायपुर साहित्य उत्सव' ह सुरू होय के पहिलीच विवाद म फंसगे। शहर के पढ़ईया-लिखईया मन अउ सियान मनखे मन ए तारीख मन ला लेके विरोध जतावत हें। ओमन के कहना हे कि ये दिन मन में कार्यक्रम रखना कतकोन नजर ले सही नइ ये, एखर ले उत्सव के मतलबेच खत्म हो जही।

काबर होवत हे विरोध?

विरोध करेइया मन के कहना हे कि 26 जनवरी यानी गणतंत्र दिवस हमर देस के बड़े तिहार आय। एखर तइयारी बर दू-तीन दिन पहिली ले सबो झन बुता में लगे रहिथें:

• लइका अउ विद्यार्थी: स्कूल-कॉलेज के लइका मन सांस्कृतिक कार्यक्रम अउ परेड के रिहर्सल (पूर्वाभ्यास) में बियाकुल रहिथें, ओमन साहित्य उत्सव में कइसे जा पाहीं?

• गुरुजी अउ प्रोफेसर: स्कूल-कॉलेज के जिम्मेदारी गुरुजी मन के ऊपर रहिथे, एखर सेती ओमन घलो ए साहित्य के महाकुंभ के लाभ नइ उठा पायें।

• सरकारी करमचारी: सासन-प्रसासन के जम्मो अमला सुरक्षा व्यवस्था, झंडा फहराय के तइयारी अउ प्रोटोकॉल निभाय में व्यस्त रहिथे।

जब मनखेच नइ रहिही, त कइसन उत्सव?

रायपुर के मनखे मन के कहना हे कि कोनो भी साहित्य उत्सव के सफलता ओखर भीड़ अउ विचार-गोष्ठी ले होथे। जब सहर के पढ़इया लइका अउ बुद्धिजीवी वर्ग (शिक्षक) गणतंत्र दिवस के तइयारी में लगे रइही, त पंडाल में सन्नाटा छा जाय के डर हे।

सोशल मीडिया में घलो लोगन मन सवाल उठावत हें कि आखिर अइसन तारीख के चुनाव कउन ह करिस? का आयोजक मन ला राष्ट्रीय पर्व के व्यस्तता के धियान नइ रिहिस?

तारीख बदले के मांग

साहित्य प्रेमी मन सासन-प्रसासन ले मांग करे हें कि यदि ए उत्सव के असली फायदा आम जनता अउ विद्यार्थी मन तक पहुँचाना हे, त एखर तारीख ला बदलना जरूरी हे। लोगन के कहना हे कि अइसन बेरा में आयोजन करना सिर्फ एक 'खानापूर्ति' (औपचारिकता) बनके रह जही।