रायपुर। छत्तीसगढ़ी फिल्म जगत ले एक बड़का खबर निकलके आगू आये हे। नवा छत्तीसगढ़ी फिल्म 'जान लेबे का' के रिलीज के तारीख तय हो गे हे। ये फिल्म आने वाला 15 मई 2026 के आप मन के नजदीकी सिनेमाघर मन म धूम मचाए बर आही।
पोस्टर म दिखिस प्रेम अउ संघर्ष के झलक
फिल्म के नवा पोस्टर ह रिलीज होते साथ सोशल मीडिया म छा गे हे। पोस्टर म एक कोती डबडबाये आंखी दिखत हे, त दूसर कोती एक धनुर्धारी जोद्धा पहाड़ मन डहर मुँहू करके खड़े हे। एला देख के अंदेशा लगाये जा सकत हे कि फिल्म म मया (प्रेम) के संग-संग जबरदस्त एक्शन अउ सुग्घर कहानी देखे बर मिलही।
मजबूत टीम अउ कलाकार
ये फिल्म के निर्माण म छत्तीसगढ़ी सिनेमा के मंझे हुए कलाकार अउ तकनीशियन मन के हाथ हे-
निर्देशक (Director): आलेख चौधरी।
निर्माता (Producer): लक्ष्मीप्रकाश जायसवाल।
वितरण (Distributor): छत्तीसगढ़ी सिनेमा के दिग्गज सतीश जैन जी ह ए फिल्म के डिस्ट्रीब्यूशन के जिम्मेदारी सम्हाले हें।
बैनर: लायरा प्रोडक्शन।
बड़े कलाकार मनके महफ़िल
फिल्म मा कलाकार मन के एक बड़े फौज हे जेमा मन, लक्षित झांझी अउ काजल सोनबेर, दीक्षा जायसवाल मुख्य भूमिका म नज़र आही। ओकर मन के संग संजय बत्रा, मनमोहन सिंह ठाकुर अउ चंद्रकला तिवारी जइसे मंझे हुए कलाकार मन अपन अभिनय के जादू बिखेरहीं।
संगीत अउ सुग्घर लोकेशन
फिल्म के गाना मन ला सुरीला बनाय बर सुनील सोनी जी ह संगीत दे हें। पोस्टर म जउन सुग्घर पहाड़ अउ खेत दिखत हे, ओकर ले पता चलत है कि फिल्म के शूटिंग छत्तीसगढ़ के असली अउ प्राकृतिक सुंदर जगह मन म करे गे हे।
संगवारी मन, त अब तैयार हो जाव 15 मई के अपन परिवार के संग अपन नजदीकी सिनेमा घर जाय बर!
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।