रायपुर: छत्तीसगढ़ी सिनेमा जगत के बड़े फिल्म मेकर मोहन सुंदरानी एक बार फेर पारिवारिक अउ संस्कारित फिल्म 'मयारू भौजी-2' लेके आवत हें। सुंदरानी फिल्म्स ह हमेशा ले हमर प्रदेश के लोक कला, परंपरा अउ संस्कृति ला सहेज के रखे के काम करे हावे। जब तकनीक के कमी रहिस, तब घलो घर-घर तक सीडी अउ कैसेट के माध्यम ले छत्तीसगढ़ी संस्कृति ला पहुँचाने वाला सुंदरानी परिवार अब बड़े पर्दा म एक नवा कहानी पेश करे बर तइयार हे।
ए फिल्म के सबले बड़े आकर्षण सुंदरानी परिवार के नवा पीढ़ी के बेटा निखिल सुंदरानी के फिल्मी दुनिया म कदम रखना हे। निखिल ह ए फिल्म ले बतौर नायक अपन करियर के शुरुआत करत हें। बचपन ले ही फिल्मी माहौल अउ संस्कार म पले-बढ़े निखिल ले दर्शक मन ला भारी उम्मीद हे। समीक्षक मन के कहना हे कि निखिल के मेहनत अउ अदाकारी ले छालीवुड ला वो सुपरस्टार मिल सकही, जेकर लंबा समय ले अगोरा रहिस हे।
'मयारू भौजी-2' के निर्माता विजय सुंदरानी अउ हितेन्द्र सुंदरानी हें, जबकि फिल्म के निर्देशन मंझे हुए निर्देशक उत्तम तिवारी ह करे हें। ए फिल्म म मुख्य कलाकार के रूप म मन कुरैशी, लता साहू, आस्था शर्मा अउ उपासना वैष्णव जइसे दिग्गज कलाकार घलो नजर अइहीं। फिल्म के गीत-संगीत ला उत्तम तिवारी, ज्योति कंवर, सूरज महानंद अउ सौरभ महतो ह सजाए हें, जेकर धुन मन ला लोगन मन अभी ले गुनगुनाना शुरू कर दे हें।
बता दन कि ए फिल्म ह 15 मई 2026 ले पूरा छत्तीसगढ़ के सिनेमाघर मन म प्रदर्शित होही। मोहन सुंदरानी के कहना हे कि सिनेमा समाज के आईना होथे, एखर सेती उमन नशामुक्ति, शिक्षा अउ सामाजिक सुधार ला हमेशा प्राथमिकता दे हें। 'मयारू भौजी-2' घलो पारिवारिक मूल्य अउ पवित्र रिश्ता मन के एक नवा परिभाषा गढ़ही। छत्तीसगढ़ी सिनेमा प्रेमी मन ला अपील करे गे हे कि उमन अपन संस्कृति ला बढ़ावा दे बर सपरिवार थियेटर जाके ए फिल्म ला जरूर देखंय।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।