छत्तीसगढ़ सरकार के खेल अऊ युवा कल्याण विभाग डहर ले साल 2025 बर 'युवा रत्न सम्मान योजना' के घोषणा कर दे गे हे। राज्य स्तरीय समिति ह बइठक मा विचार-विमर्श करे के बाद अलग-अलग क्षेत्र मा नीक बुता करइया राज्य के 9 प्रतिभा मन के चुनाव करे हे। ये सम्मान बर चुने गे नाव मन मा हमर छत्तीसगढ़ के मशहूर लोक गायिका सुश्री ओजस्वी (आरु) साहू के नाव घलो सामिल हे।
ये सम्मान 12 जनवरी 2026 के दिन दे जाही। विभाग डहर ले जारी आदेश मा बताया गे हे कि ये सम्मान साहित्य, शिक्षा, खेल, कला अऊ नवाचार जइसे क्षेत्र मा उत्कृष्ट बुता करइया मन ल दे जावत हे।
लोक कला के मान बढ़ाइस आरु साहू: धमतरी के बेटी ल मिलिही सम्मान
छत्तीसगढ़ी लोक संगीत के दुनिया मा आज आरु साहू कहुं पहिचान के मोहताज नइ हे। धमतरी जिला के रहइया आरु साहू ल 'युवा रत्न सम्मान (लोक कला)' बर चुने गे हे।
आरु साहू के बारे मा खास बात:
- नन्हे उम्र मा बड़का नाम: आरु ह बहुते कम उमर ले छत्तीसगढ़ी लोक गीत-संगीत के सेवा करत हें। ओकर सुग्घर अवाज ह आज हर छत्तीसगढ़िया के दिल मा बसे हे।
- संस्कृति के दूत: सोशल मीडिया ले लेके बड़े-बड़े मंच तक आरु ह छत्तीसगढ़ी परम्परा, करमा, ददरिया अऊ सुआ गीत मन ल नवा पीढ़ी तक पहुँचाए के काम करत हें।
- धमतरी के गौरव: धमतरी जिला के कुरुद इलाका ले निकल के आरु ह आज पूरा देश-दुनिया मा छत्तीसगढ़ी कला के झंडा गाड़त हें।
राज्य सरकार डहर ले मिले ये सम्मान ह न केवल आरु साहू बर, बल्कि प्रदेश के जम्मों लोक कलाकार मन बर गौरव के बात आय।
सम्मान पायइया मन के नाम:
- युवा स्टार सेवा समिति खुरतुली, धमतरी (संगठन)
- श्री पीयूष जायसवाल, बेमेतरा (युवा)
- सुश्री शिल्पा साहू, कांकेर (सामाजिक)
- श्री अमित यादव, सरगुजा (साहित्य)
- सुश्री मृणाल विदानी, महासमुंद (नवाचार/उद्योग)
- सुश्री परिधि शर्मा, दुर्ग (शिक्षा)
- सुश्री संजू देवी, बिलासपुर (खेल)
- श्री सचिन कुनहरे, कवर्धा (कला एवं सांस्कृतिक)
- सुश्री ओजस्वी (आरु) साहू, धमतरी (लोक कला)
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।