धरती आबा भगवान बिरसा मुंडा के जीवन म बनत हाबे फिलिम 'माटीपुत्र बिरसा बलिदानी'

छत्तीसगढ़ी सिनेमा म अब अपन पेन-पुरखा के सुरता अउ उंकर बुता ल जनमानस म बगराये खातिर सिनेमा के निर्माण होए बर लगे हावय। इही ओढ़र म आरो मिले हावय के धरती आबा भगवान बिरसा मुंडा के जीवन म एक छत्तीसगढ़ी फिलिम बनत हावय 'माटीपुत्र बिरसा बलिदानी' नाव ले। श्री निधि फिल्म प्रोडक्शन हाउस के बेनर तरी बने ये फिलिम के निर्माता हावय खेमराज बाकरे, लेखक अउ निर्देशक हीरा मानिकपुरी हावय। 

पाछु दिन भगवान बिरसा मुंडा जी के 150वी जयंती के मउका म फिलिम 'माटीपुत्र बिरसा बलिदानी' के फस्ट पोस्टर के लांचिंग गरियाबंद के मैनपुरी म करे गिस। जेमा माई पहुना के रूप म छत्तीसगढ़ फिल्म विकास निगम अध्यक्ष सुश्री मोना सेन सामिल रिहिन।

बिरसा मुंडा ऊपर बनत ये पहिली छत्तीसगढ़ी फिलिम होही। मिले आरो के मुताबिक माटीपुत्र बिरसा बलिदानी म अहम किरदार म नजर आही आकाश सोनी अउ काजल सोनबेर। येकर अलावा येमा कई नामी थियेटर कलाकार मनके शानदार अदाकारी देखे बर मिलही। फिलिम के शूटिंग गरियाबंद के सुदूर अंचल म चलत रहिस हावय। 

बताये जावथे के फिलिम के कहानी म दू बखत के किस्सा ह सरलग पसलोर पाही। एक तो डहर बिरसा मुंडा के क्रांति अउ संघर्ष के वीरगाथा अऊ दूसर कोत आज के बेरा के नायक ह आदिम समाज के डहरचलती थाह लेवत दिखही। अंग्रेजी शासन अउ जमीदार मन कोति ले आदिवासी समाज म होवत अत्याचार संग जल, जंगल अउ जमीन म बरपेली कब्जा जइसन मुद्दा ल प्रमुखता ले देखाये जाही। कुल मिलाके केहे जाए तो ये फिलिम धरती आबा भगवान बिरसा मुंडा के जीवन के संघर्ष के संग वर्तमान समय के यात्रा ले संदेशात्मक सुखांत तक पहुंचही। 

फिलिम 'माटीपुत्र बिरसा बलिदानी' के खास बात-

• भगवान बिरसा मुंडा-

बिरसा मुंडा एक भारतीय आदिवासी स्वतंत्रता सेनानी अउ मुंडा जनजाति समाज के लोक नायक रहिन। ओमन ब्रिटिश राज के बखत 19वीं शताब्दी के अंत म बंगाल प्रेसीडेंसी (अब झारखंड) म होए एक आदिवासी धार्मिक सहस्राब्दी आंदोलन के अगुवाई करिन। भारतीय स्वतंत्रता आंदोलन के इतिहास म उन अमर शहीद के दर्जा पाइन, भारत के आदिवासी उनला भगवान मानथे अउ धरती आबा नाम ले जाने जाथे।

• हीरा मानिकपुरी-

छत्तीसगढ़ी सिनेमा बर हीरा मानिकपुरी कोनो नवा नाम नोहय, ओमन रायपुर के नाट्य मंच ले एनएसडी तक के सफर तय करे हावय। केऊ ठी नाटक के लेखन अउ निर्देशन के संग ओमन कला गुरू के रूप नवा पीढ़ी ल अभिनय के पाठ तको पढ़ाथे। ये फिलिम 'माटीपुत्र बिरसा बलिदानी' म ओमन के लेखन अउ निर्देशन के कमाल देखे बर मिलही।

• आकाश सोनी अउ कालज सोनबेर-

छॉलीवुड म आकाश सोनी अउ कालज सोनबेर के कई ठी फिलिम आ चुके हावय। संग म कई वीडियो एल्बम म तको ओमन संघरे काम करे हावय- अब माटीपुत्र बिरसा बलिदानी म ओमन नवा रूप म दिखही।

• फिल्म- माटीपुत्र बिरसा बलिदानी
• प्रोडक्शन- श्री निधि फिल्म प्रोडक्शन हाउस
• निर्माता- खेमराज बाकरे
• लेखक/निर्देशक- हीरा मानिकपुरी
• स्‍टार कास्‍ट- आकाश सोनी, काजल सोनबेर
• छायांकन- कार फर्मा