शहीद वीर नारायण सिंह जी के 168वां शहादत दिवस
छत्तीसगढ़ के गौरव पुरुष अऊ राष्ट्रीय स्तर म अगुवा शहीद वीर नारायण सिंह जी के 168वां शहादत दिवस के मउका म 10 दिसम्बर के शहादत स्थल जयस्तंभ चौक रायपुर म स्थापित प्रतिमा स्थल म राज्य आंदोलनकारी छसपा अऊ छत्तीसगढ़ संयुक्त किसान मोर्चा डहर ले जबर सुरता कार्यक्रम रखे गे हावय।
मिले आरो के मुताबिक ये सुरता जलसा म राज्य आंदोलनकारी प्रमुख अनिल दुबे, जी.पी. चंद्राकर, दीनदयाल वर्मा, जागेश्वर प्रसाद, लालाराम वर्मा, चेतन देवांगन, छन्नू लाल साहू, शिवनारायण ताम्रकार, अऊ सर्व छत्तीसगढ़िया समाज के प्रमुख ललित बघेल, तुकाराम साहू सहित सैकड़ो किसान, जवान, महिला, कलाकार, साहित्यकार मन भाग लेही।
कार्यक्रम के सुरुवात राज्य आंदोलनकारी नेता अनिल दुबे, जी.पी. चंद्राकर, दीनदयाल वर्मा डहर ले शहीद वीर नारायण सिंह जी के प्रतिमा म माल्यार्पण अऊ शहीद अमर जवान ज्योति जलाके करे जाही। कार्यक्रम बिहनिया 11 बजे ले शुरू होगे संझा 6 बजे तक चलही।
कार्यक्रम के प्रमुख आकर्षण:
👉 राष्ट्रीय स्तर के कवि गीतकार रामेश्वर वैष्णव, मीर अली मीर, मिनेश साहू के कविता पाठ
👉 राष्ट्रीय स्तर के पंडवानी कलाकार चेतन देवांगन के पंडवानी
👉 छत्तीसगढ़ के लोकप्रिय रामायणिक नंद कुमार साहू के पंथी धुन
👉 छत्तीसगढ़ के लोकप्रिय कलाकार राकेश तिवारी डहर आल्हा तर्ज म वीर नारायण सिंह जी के शौर्य गाथा
👉 अंतरराष्ट्रीय कलाकार सुश्री ममता आहार के नाटक के प्रस्तुति
👉 वरिष्ठ इतिहासकार डॉ. रामेंद्र मिश्र अऊ डॉ. दाऊ के.के. अग्रवाल मनके आलेख पठन
छत्तीसगढ़ के गौरव पुरुष शहीद वीर नारायण सिंह के सुरता कार्यक्रम के बखत बीच–बीच म अनिल दुबे, दीनदयाल वर्मा, चेतन देवांगन, छन्नू साहू, ललित बघेल, तुकाराम साहू सहित अउ सियान मन अपन बिचार रखही।
कार्यक्रम के संचालन लोकतंत्र सेनानी अऊ छत्तीसगढ़ राज्य निर्माण सेनानी जागेश्वर प्रसाद करही। समापन म संझा 5 बजे सैकड़ों कार्यकर्ता मन हर ले 168 दीप प्रज्वलित करके हमर पुरखा शहीद वीर नारायण सिंह के सम्मान म “अखंड अमर जवान ज्योति” के स्थापना करे जाही।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।