छत्तीसगढ़ी फिल्म विकास निगम ह करिस वरिष्ठ कलाकार उपासना वैष्णव के सम्मान

छत्तीसगढ़ी सिनेमा जगत बर एक गरब के बात हे कि छत्तीसगढ़ फिल्म विकास निगम डाहर ले सुप्रसिद्ध अउ वरिष्ठ कलाकार उपासना वैष्णव जी के सम्मान करे गे हे। उपासना वैष्णव जी छत्तीसगढ़ी सिनेमा के अइसन कलाकार हें, जेमन सैकड़ों फिल्म म अपन शानदार अदाकारी के जादू बिखेर के दर्शक मन के दिल म अपन एक खास ठउर बनाय हें। ओमन के अभिनय के दीवानगी अइसन हे कि दर्शक मन ओमन के हर फिल्म के बेसब्री ले अगोरा करथें। उपासना जी ह न केवल छत्तीसगढ़ी, बल्कि हिंदी अउ भोजपुरी फिल्म मन म तको अपन अभिनय के लोहा मनवा चुके हें।

अपन ए सम्मान ले गदगद होके उपासना वैष्णव जी ह सोशल मीडिया के माध्यम ले अपन खुशी जाहिर करिन अउ कला के प्रति अपन विचार साझा करिन। ओमन लिखिन कि- "एक अच्छा कलाकार अपन कल्पना, मेहनत अउ धैर्य ले कला ला निखारथे। वो ह साधारण चीज मन म तको विशेष सौंदर्य देख लेथे अउ ओला अपन सृजन के माध्यम ले व्यक्त करथे।"

ओमन आगू कहिन कि कला ओमन बर सिर्फ एक काम नइ आय, बल्कि आत्मा के आवाज आय। एक कलाकार अपन कला ले मनखे मन के दिल ला छू लेथे अउ समाज ला एक नवा सोच देथे। उपासना जी के ए उपलब्धि ले जम्मो छत्तीसगढ़ी फिल्म इंडस्ट्री अउ ओमन के चाहने वाला मन म भारी उत्साह देखे बर मिलत हे।