किसान विरोधी आय भाजपा सरकार: भूपेश बघेल के बड़का हमला

छत्तीसगढ़ म धान खरीदी ला लेके राजनीति गरमा गे हे। पूर्व मुख्यमंत्री भूपेश बघेल ह वर्तमान विष्णुदेव साय सरकार ला 'किसान विरोधी' बतावत घेरे हे। बघेल के कहना हे कि प्रदेश म धान खरीदी म किसान मन ला भारी परेशानी के सामना करना पड़त हे। कोनो किसान एक महीना त कोनो दू महीना ले अपन टोकन के अगोरा करत हे, फेर समय म टोकन नइ कट पावत हे। किसान मन ए सरकार के लचर व्यवस्था ले गजब हनाकान हो चुके हें, अउ प्रदेश के सत्ताधारी नेता मन चुप बइठ के तमाशा देखत हें। उहें, कांग्रेस पार्टी विपक्ष के भूमिका निभावत लगातार किसान मन के हक बर आगू आवत हे।

भूपेश बघेल ह सोशल मीडिया के माध्यम ले सुकमा जिला के घटना के जिक्र करत सरकार के खिलाफ अपन विरोध दर्ज कराईस हे। ओ मन लिखिन कि आज सुकमा के किसान मन ला अपन मांग पूरा करवाय बर नेशनल हाईवे म चक्का जाम करे बर मजबूर होना पड़िस। किसान मन के मांग हे कि एक दिन म 600 क्विंटल धान खरीदी के जो लक्ष्य सरकार ह रखे हे, ओला बढ़ाके 1200 क्विंटल करे जाय। ताकि किसान मन अपन मेहनत के फसल ला तय समय सीमा के भीतर बेच सकें।

बघेल ह सरकार ला चेतावत कहिन कि किसान मन के ये मांग पूरी तरह ले जायज हे। सरकार ला तुरंत ए विषय म संज्ञान लेना चाहिये अउ मांग ला स्वीकार करना चाहिये। किसान मन के बढ़त आक्रोश ला देखत अब ये मुद्दा आने वाला दिन म अउ गरमा सकत हे।