छत्तीसगढ़ पर्यटन बोर्ड ह राज बने के रजत जयंती बछर के मउका म 08 दिसंबर ले 21 दिसंबर 2025 तक बिसेस कार्यक्रम अउ प्रतियोगिता के सिलसिला चलावत हे। एही कड़ी म, प्रदेश के जम्मो पर्यटन केंद्र अउ रिजॉर्ट के संग, पर्यटन बोर्ड के रायपुर कार्यालय म घलो रचनात्मक कार्यक्रम करे जात हें, जेकर उद्देश्य ह छत्तीसगढ़ के पर्यटन ला नवा मकाम म पहुंचाना हे।
✍️ 15 दिसंबर तक स्लोगन लिखव
एही सिलसिला ला आगू बढ़ावत, पर्यटन बोर्ड ह 15 दिसंबर 2025 तक ऑनलाइन स्लोगन प्रतियोगिता रखे के फइसला करे हे। ए प्रतियोगिता के उद्देश्य ह छत्तीसगढ़ के प्राकृतिक सुंदरता, संस्कृति अउ पर्यटन के जगह मन ला नवा नजरिया ले दुनिया के सामने लाना हे।
प्रतियोगी मन ला छत्तीसगढ़ के पर्यटन, संस्कृति, सुंदरता, अउ विरासत ऊपर स्लोगन लिखे बर परही।
👥 कौन-कौन हो सकत हे सामिल?
- भारत के कोनो भी हिस्सा ले 16 बछर या ओकर ले जादा उम्मर के मन ऑनलाइन अपन प्रविष्टि भेज सकत हें।
- स्लोगन खुद के बनाए, मौलिक अउ 'छत्तीसगढ़ पर्यटन, रजत जयंती साल 2025' के थीम ऊपर आधारित होए चाही।
- स्लोगन जादा ले जादा 20 सब्द के हो सकत हे।
- कोनो भी परकार के नकल या पहिली ले छपे सामग्री मान्य नइ होही।
- स्लोगन हिंदी या अंग्रेजी कोनो भी भाखा म हो सकत हे।
- एक झन प्रतियोगी सिरिफ एक ठन स्लोगन भेज सकत हे।
- भेजे गे स्लोगन के उपयोग बोर्ड ह प्रचार-प्रसार म बिना जादा अनुमति के कर सकत हे।
📧 प्रविष्टि कइसे भेजहीं
- प्रतियोगी मन ला अपन स्लोगन निर्धारित ईमेल it@visitcg.in के माध्यम ले भेजे बर परही। जरूरी जानकारी: स्लोगन के संग अपन नाँव, उम्मर, मोबाइल नंबर, ई-मेल, अउ पता के संक्षिप्त विवरण लिखे बर अनिवार्य हे।
🏆 पुरस्कार अउ सम्मान
मिलिस जानकारी के मूल्यांकन 19 दिसंबर के होही, जेमा रचनात्मकता, तकनीकी गुणवत्ता, अउ बिषय के अनुरूपता ल देखे जाही।
विजेता मन ला ए पुरस्कार दीन जाही:
- पहिली पुरस्कार: ₹ 1,500 नकद
- दूसर पुरस्कार: ₹ 1,000 नकद
- तीसर पुरस्कार: ₹ 700 नकद
- नकद राशि के संग प्रमाण-पत्र घलो दीन जाही।
सबसे बढ़िया स्लोगन ला आगू चलके छत्तीसगढ़ पर्यटन बोर्ड के प्रचार सामग्री अउ डिजिटल प्लेटफॉर्म म जगा दे जाही, जेकर ले प्रतिभागी मन ला बड़का पहिचान मिल सकत हे।
अपील: राज के युवा, पर्यटक अउ आम नागरिक मन ले जादा ले जादा संख्या म सामिल होए के अपील करे गए हे। जादा जानकारी बर: आप मन 89823-25900 म फोन करके पूछ सकत हव।
छत्तीसगढ़ी अनुवादक- जयंत साहू
संपादक- अंजोर छत्तीसगढ़ी समाचार
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।