छत्तीसगढ़ी सिनेमा म एक बार फेर जल, जंगल अउ जमीन खातिर रार मचही। काबर के फिलिम में नाम हे 'दण्डाकोटुम' अउ लेखक-निर्देशक हावय अमनेश नागेश। अतका म आकब लगा डारे होहू के ये फिलिम कइसन होही। जेन मन गम नी पाथे तेन मन, जारी पोस्टर ल देखा। सोशल मीडिया ले मिले आरो के मुताबिक अमलेश नागेश के छत्तीसगढ़ी फिल्म दण्डाकोटुम के शूटिंग शुरू हो चुके हावय। जोहार फिल्मस प्रोडक्शन अउ कोया फिल्मस प्रोडक्शन के बैनर तरि बनत ये फिलिम के निर्माता हावय रमेश चंद्र श्याम। प्रोजेक्ट डिजाइन अउ डीओपी के भार संभाले हावय रजत सिंह राजपूत। प्रोडक्शन टीम कोति ले पाछू दिन फिलिम के पोस्टर तको जारी करे जा चुके हावय।
फिलिम के बारे में कोनो अधिकारिक प्रेस नोट जारी नइ करे गे हावय लेकिन कलाकार मन कोति ले सरलग सोशल मीडिया म येकर जानकारी साझा करे जावत हाबे।
का हो सकत हावय फिलिम के कहानी-
छत्तीसगढ़ी भाषा म बनत फिलिम के कहानी के बारे में कहे जाथे के दण्डाकोटुम के असल मतलब 'जंगल के परिवार' ले होथे, तव कहानी ल छत्तीसगढ़ बर ऐतिहासिक केहे जा सकत हाबे। जल, जंगल अउ जमीन के गोठ होही, आदिवासी मन के संघर्ष के पीरा, पलायन के मजूबरी, जीव-जनावर के मया अउ प्रकृति के भितरी के मरम ल सिनेमा म उकेरे जाही। कुल मिलाके केहे जाए तो छत्ती सगढ़ के आदिवासी समाज लोक जीवन के झलक देखे बर मिलही।
कोन-कोन हावय अहम किरदार म-
दण्डाकोटुम कोति ले कोनो खास जानकारी तो नइ मिल हावय लेकिन पोस्टर में अमलेश नागेश अउ लावण्या दास अहम किरदार म दिखत हाबे। अमलेश नागेश के साथ जगदलपुर के लावण्या दास डेब्यू करत हाबे। ये पइत अमलेश नागेश के टीम म रजत राजपूत के अलावा ओमी स्टाइलो अउ खुशी दास, संग म अमलेश के परिवार तको प्रोडक्शन टीम ल नजर आवथे।
अभी तो सिनेमा के बुता हर सरलग चलत हाबे, तभो ले आकब करे जाए तो अवइया बछर येला सिनेमाघर म देख पाबो। बहरहाल ‘दण्डाकोटुम’ के सफलता खातिर अमलेश नागेश अउ ओकर पूरा टीम ल हमर कोति ले गाड़ा-गाड़ा बधाई अउ शुभकामना।
छत्तीसगढ़ी अनुवादक - जयंत साहू
अंजोर : छत्तीसगढ़ी समाचार
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।