दिव्यांग रग्बी खिलाड़ी ल 90 हजार रूपिया के आर्थिक अनुदान

मुख्यमंत्री विष्णु देव साय के निवास म जनदर्शन कार्यक्रम रखे गे रहिस। जेमा रायपुर जिला के अभनपुर ले आए दिव्यांग रग्बी खिलाड़ी पिंटू राम साहू के मांग ऊपर मुख्यमंत्री ह तुरते निर्णय लेके 90 हजार रूपिया के आर्थिक सहायता मंजूर कर दीस। श्री साहू ह व्हीलचेयर अउ जरूरी खेल समान खरीदे बर मदद मांगे रहिस। उनकर स्थिति अउ जरूरत ला समझत मुख्यमंत्री ह तुरते चेक देके मदद कर दीस।

आवेदक पिंटू राम साहू ह बताइस के वो चार बछर ले खेल जगत म जुड़े हावय। 2 अक्टूबर 2025 म वो पहली बेरघरी रग्बी खेल बर ग्वालियर यात्रा करे रहिस। अभी वो बी.ए. फाइनल ईयर के विद्यार्थी हावे अउ अपन दिव्यांगता के बावजूद खेल म अपन भविष्य बनाय बर लगातार मेहनत करत हावे।

मुख्यमंत्री ले आर्थिक मदद मिले के बाद श्री साहू ह अपन खुशी जाहिर करत कहिस के ए सहयोग ओखर बर एक बड़का प्रेरणा आय। वो मुख्यमंत्री साय के प्रति आभार जताइस अउ कहिस के अब वो खेल म अउ बढ़िया प्रदर्शन करके छत्तीसगढ़ के नाम ला रोशन करही।

छत्तीसगढ़ी अनुवादक - जयंत साहू

अंजोर: छत्तीसगढ़ी समाचार