शिक्षिका ह अपन जन्मदिवस म दिस नेवता भोज

प्रधानमंत्री पोषण  भोजन योजना ले सरकारी पूर्व माध्यमिक स्कूल पतरापाली म वो समय हर्ष अउ उल्लास के वातावरण बनगे, जब स्कूल के शिक्षिका श्रीमती अनिता सिंह ह अपन जन्मदिवस के मउका म स्कूल के सबो लइका अउ शिक्षक मन ल नेवता भोज दीस। ए मउका म लइका ल सामान्य मध्यान्ह भोजन के संग-संग केला, समोसा, क्रीम ब्रेड अउ मीठा लड्डू परोसे गिस, जेकर ले सबो पढ़ईया मन के चेहरा म खुशी झलक उठिस।

कार्यक्रम के आयोजन प्रधानमंत्री पोषण  भोजन योजना ले करे गिस, जेकर माध्यम ले लइका ल अकताहा पोषण दे के तको उद्देश्य रिहिन। सूरजपुर जिला के सरकारी पूर्व माध्यमिक स्कूल पतरापाली के स्कूल परिवार ह ए प्रेरणादायी पहल के बढ़ई करिस। शिक्षक योगेश साहू ह शिक्षिका श्रीमती अनिता सिंह ल जन्मदिवस के शुभकामना देत किहिन कि, ‘ए रकम ले के मानवीय अउ स्नेहपूर्ण प्रयास न सिरिफ लइका के स्वास्थ्य के खातिर उपयोगी हावय, बल्कि शिक्षक अउ पढ़ईया मन के बीच आत्मीय संबंध ल तको मजबूत करत हावय।’ लइका मन ह तको खुसी व्यक्त करत किहिन के ये दिन उंकर खातिर बहुत खास रिहिन। सबो ह शिक्षिका के प्रति आभार जतात ओला दीर्घायु अउ स्वस्थ जिनगी के सुभकामना दींस। स्कूल के सबो शिक्षक, शिक्षिका अउ पढ़इया लइका ए आयोजन म सामिल होइस अउ कार्यक्रम ल सफल बनाइस।

छत्तीसगढ़ी अनुवादक - जयंत साहू

अंजोर : छत्तीसगढ़ी समाचार