महतारी अउ लइका के स्वास्थ्य सेवा ल अउ जादा प्रभावी अउ गुणवत्तापूर्ण बनाये के उद्देश्य ले स्वास्थ्य अउ परिवार कल्याण विभाग, छत्तीसगढ़ डहर ले राज्य स्वास्थ्य प्रशिक्षण संस्थान (SIHFW) के सौजन्य ले महिला स्वास्थ्य पर्यवेक्षक (एलएचवी) बर एक दिवसीय राज्य स्तरीय प्रशिक्षण कार्यक्रम के आयोजन करे गिस। प्रशिक्षण के बाद महिला स्वास्थ्य पर्यवेक्षक उच्च जोखिम गर्भावस्था (एचआरपी) के मामला ल संभाले म पहिली ले जादा कारगर होही अउ येकर ले महतारी अउ लइका के मउत दर म कमी आही।
राज्य म ए रकम के ये पहिली प्रशिक्षण कार्यक्रम हावय जेमा महिला स्वास्थ्य पर्यवेक्षक के क्षमता संवर्धन ल लेके पहल के गे हावय। ए मउका म सचिव, स्वास्थ्य अमित कटारिया, आयुक्त सह संचालक डॉ. प्रियंका शुक्ला, संचालक महामारी रोकथाम डॉ एस के पामभोई, समिलहा संचालक डॉ. निर्मला यादव, उप संचालक (मातृत्व स्वास्थ्य) डॉ. शैलेन्द्र अग्रवाल, उप संचालक (शिशु स्वास्थ्य) डॉ. वी. आर. भगत, यूनीसेफ ले डॉ. गजेन्द्र सिंह (स्वास्थ्य विशेषज्ञ) अउ विश्व स्वास्थ्य संगठन के प्रतिनिधि मौजूद रिहिन।
जानबा होवय के ये प्रशिक्षण के पहिली बैच रिहिस, जेकर पाछु अवइया चरण म 14 बैच के माध्यम ले पूरा राज्य के महिला स्वास्थ्य पर्यवेक्षक ल प्रशिक्षित करे जाही।
कार्यक्रम के बखत विशेषज्ञ ह बताइन के महतारी अउ लइका के मउत दर म कमी लाने म महिला स्वास्थ्य पर्यवेक्षक के भूमिका गजब जरूरी हावय। वो न सिरिफ समुदाय स्तर म स्वास्थ्य सेवा के पहिली पंक्ति म कार्यरत हावयं, बल्कि संस्थागत स्वास्थ्य सेवा अउ समुदाय के बीच एक सशक्त सेतु के रूप म तको अपन भूमिका निभात हावयं।
प्रशिक्षण के ले प्रजनन, मातृ, शिशु, बाल अउ किशोर स्वास्थ्य (RMNCH) सेवा म केंद्रित विषय जइसे- एएनसी (Antenatal Care), उच्च जोखिम गर्भावस्था (HRP) के पहचान अउ प्रबंधन, पीएमएसएमए (PMSMA) कार्यक्रम, जचकी पहिली अउ पाछु देखभाल, संक्रमण नियंत्रण, नवजात देखभाल अउ रेफरल समन्वय प्रणाली म विस्ता्र ले प्रशिक्षण दे गिस।
प्रतिभागी मनल समूह चर्चा, केस स्टडी अउ व्यवहारिक अभ्यास के माध्यम ले अपन अनुभव साझा करे के मउका मिलिस। प्रशिक्षण के बखत अगुवई क्षमता, कार्यकुशलता अउ समुदाय ले जुड़ाव ल सुदृढ़ बनाये म बिसेस बल दे गिस।
कार्यक्रम के समापन सत्र म पोस्ट-टेस्ट अउ फीडबैक प्रस्तुतिकरण आयोजित करे गिस। भाग लेवइया मन ह ए प्रशिक्षण ल गजब उपयोगी बताइन अउ महतारी अउ लइका स्वास्थ्य के क्षेत्र म बढि़या परिणाम सुनिश्चित करे बर निष्ठापूर्वक अपन जुमेदारी के निर्वहन करे के संकल्प लिस।
छत्तीसगढ़ी अनुवादक - जयंत साहू
अंजोर : छत्तीसगढ़ी समाचार
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।