जेल विभाग म छत्तीसगढ़ स्थापना रजत महोत्सव के शुभारंभ

राज्य शासन के निर्देश के मुताबिक छत्तीसगढ़ स्थापना के रजत जयंती के उपलक्ष्य म जेल अउ सुधारात्मक सेवा विभाग डहर ले 3 अक्टूबर ले 10 अक्टूबर 2025 तक रजत महोत्सव के आयोजन करे जात हावय। ए महोत्सव के सुरू आज केन्द्रीय जेल रायपुर म रक्तदान शिविर के संग होइस।

शिविर के सुरू करत डीजी जेल हिमांशु गुप्ता ह किहिन के छत्तीसगढ़ राज्य के प्रगति म जेल विभाग के जरूरी भूमिका हावय। ओमन किहिन के रक्तदान महादान हावय अउ सबोच स्वस्थ्य मनखे ल साल म कम ले कम एक बार स्वेच्छा ले रक्तदान करना चाही।

ए मउका म जेल विभाग के महानिदेशक गुप्ता, केंद्रीय जेल रायपुर के जेल अधीक्षक योगेश सिंह क्षत्री सहित कुल 28 मनखे मन ह रक्तदान करिन। एमे 22 जेलकर्मी अउ 4 छत्तीसगढ़ सशस्त्र बल के जवान सामिल रिहिन।

रजत महोत्सव ले राज्य के सबो पाँच केंद्रीय जेल- रायपुर, दुर्ग, जगदलपुर, बिलासपुर अउ अंबिकापुर म जेल म बंदिमन डहर ले बने जिनिस के प्रदर्शनी तको लगाये गे हावय। इहाँ आम नागरिक किफायती दर म जिनिस खरीद सकही। येकर अकताहा रजत महोत्सव सप्ताह के बखत प्रदेस के सबो 33 जेल म रक्तदान शिविर के संग-संग बंदिमन के खातिर आने-आने कल्याणकारी कार्यक्रम के आयोजन करे जाही।