पर्यटन अऊ संस्कृति मंत्री राजेश अग्रवाल हनपुर तहसील के ग्राम हंसडांड म नवा कॉलेज भवन के भूमिपूजन करिस

पर्यटन अऊ संस्कृति मंत्री राजेश अग्रवाल ह सरगुजा जिला के लखनपुर तहसील के ग्राम हंसडांड म 4 करोड़ 65 लाख रुपिया के लागत म बनइया शासकीय महाविद्यालय भवन के भूमिपूजन करिस।

ये मउका म ओमन किहिन के सरकार के पहिली प्राथमिकता हे कि हमन अपन इलाका के युवामन ला बढ़िया शिक्षा अऊ अच्छा भविष्य के सुविधा इही गांव म मिलय। ये महाविद्यालय के बन जाए ले गांव अऊ आसपास के बचपन ले लेके स्नातक तक के पढ़ई के बढ़िया सुविधा एके ठिकाना म मिलही। नवा भवन ले गांव के लइकामन ला रोजगार संग जोड़े के नवा रद्दा खुलही। शिक्षा के विस्तारच समाजिक विकास अऊ आत्मनिर्भरता के सच्चा रद्दा हे।

गांव के जनप्रतिनिधी अऊ विद्यार्थी मन सरकार बर आभार जताइस अऊ कहिन कि बरसों ले करे जावत मांग आज पूरा हो गिस- ये इलाका के युवामन के सपना पूरा होगे। अब ओमन ला सब सुविधा सहित भवन म बढ़िया माहौल म पढ़ई करे अऊ अपन भविष्य गढ़े के मौका मिलही।

गांव के रहवइया मन कहिन- ये महाविद्यालय हमर लइका मन के सपना ला नवा उडान देही, अऊ अब ओमन अपन गांव म रहिके पढ़ई-लिखई करके अपन करियर बना सकही। भूमिपूजन के मौका म स्थानीय जनप्रतिनिधी, गांव वाले, विद्यार्थी अऊ उच्च शिक्षा विभाग के अधिकारी मन उपस्थित रहिन।