छत्तीसगढ़ के पूर्व मुख्यमंत्री भूपेश बघेल ह अपन पंजाब यात्रा के बाद एक बयान जारी करिन। ओह अपन फेसबुक पेज म लिखिन के- “पंजाब ला जितना नुकसान बरसात ले होए हे, ओकर ले डेढ़ गुना जियादा नुकसान केंद्र अऊ राज्य सरकार के लापरवाही ले होए हे।”
भूपेश बघेल कहिन के बरसात ले बने भीषण आपदा के घड़ी म सरकार मन अपन जिम्मेदारी पूरा करे म असफल रहिन। हजारों परिवार उजड़ गिन, किसान मन के फसल डूब गिन, घर-बार उजड़ गिन, फेर सरकार के मदद जमीनी स्तर तक नई पहुंच पाइस।
ओखर मुताबिक, आम जनता अऊ संगत मन अपन अपन स्तर ले राहत पहुंचाय म जुट गे हावंय। गुरुद्वारा समिति, सामाजिक संगठन अऊ नौजवान मन खुद मोर्चा संभाले हावंय। जेन संकट के समय म सरकार ला आगे आना चाही, ओखर जगह जनता मन अपन जिम्मेदारी पूरा करत हावंय।
भूपेश बघेल कहिन- “सरकार पूरी तरह ले फेल साबित होगे हवय। पंजाबी मनला अकेला छोड़ दे गे हावे। जनता खुदे अपन दुख-दर्द के इलाज खोजत हवय। संकट के समय जनता के एकजुटता अऊ भाईचारा काबिले तारीफ हे, फेर सरकार के चुप्पी अक्षम्य हे।”
बघेल जी के ये बयान ले साफ जाहिर होथे के पंजाब म बरसात ले बने आपदा ह सिरिफ प्राकृतिक आपदा नइ, बल्कि प्रशासनिक लापरवाही के भारी नतीजा घलो आय।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।