रायपुर के धरसींवा थाना क्षेत्र म गोदावरी स्टील फैक्ट्री म एक बड़े हादसा होगे हवय। जानकारी अनुसार, निर्माणाधीन प्लांट के कुछ हिस्सा टूट के नीचे गिरगे, जेकर ले मलबा म कई मज़दूर दब गिन अउ कई घायल होगे।
घटना के खबर मिलतेच रायपुर पुलिस के आला अधिकारी मन तुरते मउका म पहुँचगे। घायल मन ल तुरते इलाज खातिर देवेंद्र नगर के निजी अस्पताल म लानेे गे हवय।
पहिली जानकारी म बता गे हवय कि हादसा म कई मज़दूर के मौत के खबर आय हे। प्रशासन अउ पुलिस राहत अउ बचाव कार्य म जुटे हवंय।
स्थानीय लोगन अउ फैक्ट्री के दूसर कर्मचारी मन घायल मन ल मलबा ले बाहर निकाले म मदद करत हवंय। पुलिस अउ अग्निशमन विभाग मन बचाव कार्य तेज कर देहे हवंय अउ घायल मन के अस्पताल म इलाज जारी हवय।
अधिकारी मन कहिन कि हादसा के कारण के जाँच करे जात हवय अउ घायल मन अउ मृतक के संख्या के पुष्टि जल्दी होही।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।