सतनामी फिल्म प्रोडक्शन रायपुर के बेनर तरी बने छत्तीसगढ़ के पहिली ऐतिहासिक फिल्म 'बलिदानी राजा गुरु बालकदास' अवइया 19 सितम्बर ले प्रदेश के सिनेमाघर म रिलीज होवइया हावय। ये फिल्म ले छत्तीसगढ़़ सहित देश आने आने राज बसे सतनामी समाज के लगभग 50 लाख लोगन के आस्था जुड़े हावय, जेन कई बच्छर ले अगोरा करत हाबे।
फिल्म के निर्माता डॉ.जे. आर. सोनी बताइस के गुरु घासीदास के द्वितीय सुपुत्र, महान प्रतापी राजा- वीर बलिदानी गुरु बालकदास के जीवन दर्शन म आधारित ये फिल्म म गुरु जी के बचपन से ले उंकर बलिदान तक के सबो प्रसंग ल बखूबी दिखाये गे हावय।
छत्तीसगढ़ के प्रथम स्वतंत्रता संग्राम सेनानी शहीद वीर नारायण सिंह, गुरु बालकदास के आपसी मित्रता ले छत्तीसगढ़ के सर्वसमाज अउ सतनामी समाज के लोगन ल अपन हक, अधिकार अउ स्वाभिमान ल जगाये के खातिर दिये योगदान के भी फिल्मांकन करे गे हावय।
फिल्म म गुरु बालकदास के भूमिका ओम त्रिपाठी, गुरु आगरदास के भूमिका मंत्री गुरु खुशवंत साहेब, शहीद वीर नारायण सिंह के भूमिका पूर्व मंत्री अमरजीत भगत, पंडित सूत्रधार के भूमिका पूर्व मंत्री डॉ. शिवकुमार डहरिया निभायेे हाबे। मुटकी माता- अमरौतिन घृतलहरे, नीरा माता- सानिया कंबोज, राधा माता- डॉ. नेहा शुक्ला, सुभद्रा माता- ममता दास, भुजबल महंत-पुनीत सोनकर, जमीदार- डॉ. अजय सहाय, ब्रिटिश ऑफिसर- ओमप्रकाश बंजारे, सरहा जोधाई-राजू नायक अउ बंटी कुर्रे, महंत के भूमिका म जी.आर. बाघमारे, आर. के. पाटले, नंदकुमार कोसले, टिकेंद्र बघेल, ध्वजवाहक के भूमिका चेतन चंदेल नजर आही।
फिल्म के निर्माता डॉ.जे.आर. सोनी, निर्देशक अमीर पति अउ संवाद किस कुर्रे लिखे हावय। गीतकार धन्नु पवन महानंद अउ सिंगर अनुराग शर्मा, सुनील सोनी, कंचन जोशी, डॉ. देवेश डहरिया ह अपन मधुर स्वर म गाये हावय। फिल्म ल बनाये म लगभग तीन साल लगिस, जेकर शूटिंग भण्डारपुरी, नया रायपुर, न्यू राजेंद्र नगर, अमलेश्वर, उड़ीसा अउ हैदराबाद म तको करे गे हावय।
छत्तीसगढ़िया मन बर गर्व के बात आय के अब हमर माटी के इतिहास ला परदा म देखे ला मिलही। "बलिदानी राजा गुरु बालकदास" ए पहिली छत्तीसगढ़ी ऐतिहासिक सिनेमा आय, जेन 19 सितंबर के दिन सिनेमा घर म रिलीज होही। ए सिनेमा गुरु घासीदास बाबा के दूसर सुपुत्र, महान प्रतापी वीर गुरु बालकदास के जीवन ले जुड़े हावय। ओमन अपन हक, अधिकार अउ स्वाभिमान खातिर जान दे रिहिन। ए कहानी केवल इतिहास नइ, ए हमर अस्मिता के आवाज आय।
🎥 अहम पात्र:
- गुरु बालकदास: ओम त्रिपाठी
- गुरु आगारदास: मंत्री गुरु खुशवंत साहेब
- वीरनारायण सिंह: मंत्री अमरजीत भगत
- पंडित सुंदरलाल: डॉ. शिवकुमार डहरिया
🎶 गीत-संगीत:
देवेश डहरिया के लिखे गीत अउ छत्तीसगढ़ी सुर मन दर्शक के दिल ला छू लेथे।
📢 काबर देखव ए सिनेमा?
- जेन मन अपन छत्तीसगढ़ के नायक ला जानना चाहथें।
- जेन मन अपन हक बर लड़ई करे वाला मन ला सम्मान देथें।
- अउ जेन मन अपन संस्कृति ले मया करथें।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।