अमलेश नागेश (भैरा कका) के नवा फिलिम ‘हंडा’ के शूटिंग शुरू, अमृता कुशवाहा होही नायिका

अंजोर.ए। एन माही फिल्म प्रोडक्शन हाउस के बैनर तने निर्मित होवइया छत्तीसगढ़ी फिल्म ‘हंडा’ के शूटिंग शुरू होगे हावय। हंडा म अमलेश नागेश फेर अपन अदाकारी के संग लेखन अउ निर्देशन के जलवा देखाही। मिले आरो के मुताबिक फिलिम के निर्माता हाबे मोहित कुमार साहू, निर्देशन के कमान संभालही अमलेश नागेश अउ छायांकन रजत सिंह राजपूत करही।

छत्तीसगढ़ी फिल्म ‘हंडा’

जानबा होवय के अमलेश नागेश छत्तीसगढ़ के एक बड़का क्रियेटर आए, सोशल मीडिया म उंकर लाखों चाहनेवाला हाबे। जो भी करथे वो अपन दम करथे अउ सफल होथे। पाछू दिन प्रदेश के बड़े फिल्म मेकर सतीश जैन के संग ओमन बतौर नायक ‘ले सुरू होगे मया के कहानी’ ले गजब लोकप्रियता बटोरिस। इही पांत म एन माही फिल्म प्रोडक्शन के ‘गुईंया’ तको सफल रिहिस। अब अमलेश नागेश खुद के लिखे कहानी म निर्देशन के कमाल देखाही।

छत्तीसगढ़ी फिलिम म हास्य के दिवाना मन के पहली पसंद अमलेश के वीडियो होथे तव भला फिलिम ल कइसे मन नइ करही। बताये जाथे के हंडा म बतौर नायिका नवोदित अदाकारा अमृता कुशवाहा ल लिये गे हावय। संग म एक बड़ा यूट्बर अनिल सिन्हा तको नजर आही। अनिल सिन्हा ‘फूफू’ के नाव ले मशहूर हे, अब सिनेमा म ओमन के नवा संग देखे बर मिलही।

हंडा के पहला शेड्यूल अमलेश नागेश के गांव कामराज लगे हावय। जिहां प्रोडक्शन टीम ड्रामा शूट करे म भीड़े हावय। हंडा जइसे के नाम ले कहानी के आकब करे जाए तव हास्य के रंग म रंगे दिखत हाबे। येकर पोस्टर तो बहुत पहिली ले ही जारी करे जा चुके रिहिस। अगोरा रिहिस नायिका के नाम जेन अमृता कुशवाहा के रूप म सामने आइस।

अमलेश नागेश के अभी केऊ फिलिम के काम चलत हाबे जेन म बड़े फिलिम सतीश जैन के साथ ‘मोर छइंहा भुंइया 2’ के तको आरो मिले हाबे। खैर जनता के मया दुलार ले ओमन के सबो फिलिम ह बने हिट साबित होए हाबे। बहरहाल हंडा बर अमलेश नगेश अउ ओकर पूरा टीम ल बहुत बहुत बधाई अउ सुभकामना।

Movie - HANDA

Production - N MAHI FILMS PRODUCTION

Producer - Mohit Kumar Sahu

Director - Amlesh Nagesh

Hero - Amlesh Nagesh

Heroine - Amrita Kushwaha

Cinematography - Rajat Singh Rajput